DİN və Baş Prokurorluq AXCP funksionerlərini qanunsuz sahibkarlıqda ittiham edir

Baş Prokurorluq və Daxili İşlər Nazirliyi Azərbaycan Xalq Cəbhəsi Partiyasının (AXCP) funksionerləri ilə bağlı birgə məlumat yayıb. Məluamtda deyilir ki, adıçəkilən qurumlar ölkənin iqtisadi maraqlarına qarşı yönəlməklə sahibkarlıq fəaliyyətinin qanunla müəyyən edilmiş qaydalarına qəsd edən cinayətlərin aşkarlanaraq qarşısının alınması istiqamətində istintaq-əməliyyat tədbirləri keçirib.

Məlumatda bildirilir ki, əməliyyat nəticəsində AXCP funksionerlərindən Əli Kərimli, Qənimət Zayidov, Saleh Rüstəmov, Vidadi Rüstəmli, Aqil Məhərrəmov, Ruslan Nəsirov, Babək Həsənov və digərlərinin Bakı şəhər sakinləri Ceyhun Hüseynov, Rauf İsgəndərov, Heydər Əhmədov, Tural Mehdixanov və qeyrilərinin üzv olduqları qurumun qanunsuz sahibkarlıq fəaliyyəti nəticəsində əldə edilmiş külli miqdarda çirkli pul vəsaitlərinin leqallaşdırılması əməllərini törətmələrinə dair sübutlar toplanıb. Prokurorluq və daxili işlər orqanları bu fəaliyyətin respublikada və xaricdə dövlətə, dövlətçiliyə və milli maraqlara zidd olaraq keçirilən tədbirlərinin maliyyələşdirilməsi üçün istifadə edildiyini bildirib.

DİN və Prokurorluğun məlumatında qeyd olunur ki, Rusiyada yaşayan Saleh Rüstəmov AXCP-nin maliyyələşdirilməsi üçün yaşadığı ölkədə təbliğat aparıb. Daha sonra o, biznes strukturlarında çalışan və əvvəllər tanıdığı ayrı-ayrı Azərbaycan vətəndaşlarından hər ay toplayaraq Moskva şəhərində kommersiya bankında açdığı hesaba 30 min ABŞ dolları keçirib. Daha sonra bu məbləğ Ceyhun Hüseynov, Rauf İsgəndərov, Heydər Əhmədov və Tural Mehdixanov vasitəsilə Vidadi Rüstəmliyə, onlardan Aqil Məhərrəmov, Ruslan Nəsirov və Babək Həsənova göndərilib. Sonuncular isə bu məbləği AXCP-nin funksionerlərinə verib. Ümumilikdə 412 min ABŞ dollarını AXCP-nin tədbirlərinin maliyyələşdirilməsinə, dəstə üzvlərinin iqtisadi maraqlarının təmin olunmasına və digər maliyyə əməliyyatlarının həyata keçirilməsinə, beləliklə də cinayət yolu ilə əldə edilmiş külli miqdarda pul vəsaitlərinin leqallışdırılması əməllərini törətmələrinə əsaslı şübhələr müəyyən olunub.

İş üzrə ötən gün saxlanılan 3 partiya fəalı Babək Həsənov, Ruslan Nəsirov, Aqil Məhərrəmovun dindirildiyi, onların da bu faktları etiraf etdiyi bildirilir. Prokurorluq və DİN bildirir ki, gənclərin evində axtarış zamanı çirkli pulların leqallaşdırılmasını təsdiqləyən bank kartları və başqa sənədlər aşkar edilib, maddi sübut kimi götürülüb.

Saleh Rüstəmov, Vidadi Rüstəmli, Aqil Məhərrəmov, Ruslan Nəsirov, Babək Həsənov, Eltac Əlisoy Cinayət Məcəlləsinin 192.3.2 (xüsusilə külli miqdarda gəlir əldə etməklə qanunsuz sahibkarlıq), 193-1.3.1 və 193-1.3.2-ci (mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) və sair maddələri ilə təqsirləndirilən şəxs qismində cəlb olunaraq barələrində məhkəmənin qərarları ilə həbs qətimkan tədbiri seçilib. İstintaqdan gizləndiyi üçün Eltac Əlisoy barəsində axtarış elan olunub.

Hazırda Baş Prokurorluğun və Daxili İşlər Nazirliyinin aidiyyatı qurumları tərəfindən zəruri istintaq-əməliyyat tədbirləri davam etdirilir.