Mühacirətdə olan siyasi fəal Rəsul Mürsəlova yenidən cinayət işi açılıb. Bu barədə Mikroskop-a danışan R.Mürsəlov deyib ki, o artıq 4 ildir Azərbaycanda deyil və ona qədər ölkədəki son iki ilini də həbsdə keçirib. Ümumilikdə 6 il heç bir iş fəaliyyəti olmasa da ona vergidən yayınma ittihamı ilə cinayət işi açılıb.
Mayın 17-də Azərbaycandakı ünvana gələn məktubda qeyd olunur ki, onun “Mers- Servis” MMC-nin rəhbəri kimi 2 823 manat vergi borcu var.
Siyasi fəal bu cinayət işinin birbaşa onun siyasi fəaliyyəti ilə bağlı olduğunu düşünür:
“Hakimiyyət mühacirətdəki siyasi fəalları İnterpol vasitəsilə ölkəyə gətirmək üçün vergidən yayınma maddəsindən sui-istifadə edir. Ancaq bu kimi addımlar məni heç bir halda siyasi fəaliyyətimdən çəkindirmir”.
R.Mürsəlov adıçəkilən şirkəti Vergilər Nazirliyinin rəsmi saytında araşdırıb. Reyestr məlumatlarından aydın olub ki, “Mers- Servis” MMC 2009-cu ildə Bakı şəhəri, Əlibəyov qardaşları, ev 75, mənzil 43-də qeydiyyatdan keçib. Həmin üvanda daha 148 şirkət qeydiyyatdan keçib. Onun adına olan ikinci şirkət “MRM” Məhdud Məsuliyyətli Cəmiyyət də öz ünvanını daha 38 şirkətlə bölüşür.
Siyasi fəal deyir ki, nə o ünvanlar, nə də şirkətlərdən xəbəri var. İndiyədək ona bu şirkətlərlə bağlı hər hansı xəbərdarlığın, sənədin gəlmədiyini də bildirir.
Rəsul Mürsəlov 2012-ci ildə dövlət sərhədini qanunsuz keçmə ittihamı ilə təqsirli bilinib və həbs olunub.
Beynəlxalq təşkilatlar onu siyasi məhbus kimi tanıyıb. O, 2014-cü ildə azadlığa çıxdıqdan sonra barəsində yenidən cinayət işi açılıb və ölkəni məcburi tərk edib. Təzyiqlər nəticəsində ailəsi ondan imtina edib.
