2013-cü ildən bəri həbsdə olan Respublikaçı Alternativ Partiyasının sədri İlqar Məmmədov 28 may yürüşündən sonra partiya üzvlərinə olan təzyiqlərlə bağlı münasibət bildirib.
İlqar Məmmədov yürüşün bütün sivil normalara və etik qaydalara uyğun olaraq keçirildiyini qeyd edib və həbslərin hakimiyyətin mənəvi olaraq onlardan zəif olduğunu göstərdiyini yazıb.
“Cümhuriyyəçilərimizin mayın 28-də İstiqlal küçəsindən başlayaraq keçirdikləri yürüş bu günkü Azərbaycan cümhuriyyətinin fəxridir.
Dinc, bütün sivil normalara və etik qaydalara uyğun olaraq keçirilən bayram yürüşündən sonra bir neçə cümhuriyyətçimizə qarşı həbs tədbiri hakimiyyətin mənəvi olaraq bizdən nə qədər zəif olduğunu göstərir. Həbslərin yürüş günü deyil, bir gün sonra həyata keçirilməsi onu göstərir ki, əslində dinc toplaşmaq məsələsində problem heç də polisin davranışı deyil. Polis tamamilə normal şəkildə bu prosesi tənzimləmişdi, sadəcə olaraq İlham Əliyev bu bayram tədbirinin miqyasını və ruhunu görəndən sonra hüquq-mühafizə orqanlarına orada iştirak edən insanların cəzalandıırlmasını tapşırıb. Bu bir daha göstərir ki, Azərbaycanda sərbəst toplaşmaq azadlığı ilə bağlı məhdudiyyət birbaşa polisdən qaynaqlanmır, bu İlham Əliyevin siyasi paxıllığından irəli gəlir”.
Sonda isə cümhuriyyətçilərə yönələn bütün təzyiqlərin uğursuz olacağını qeyd edib.
Mayın 28-də Bakının mərkəzində 28 May – Respublika Günü münasibətilə REALın təşəbbüsü ilə yürüş keçirilib.
Polis aksiyanın şəhər rəhbərliyi ilə razılaşdırılmadığını bildirərək, onun sona kimi davam etməsinə imkan verməyib.
Mayın 29-da Yasamal Rayon Məhkəməsində REAL Partiyası Ali Məclisinin üzvü A.Qasımlıya polisə tabe olmamaq ittihamı ilə 30 sutka həbs cəzası verilib
Mayın 30-da REAL Partiyası Ali Məclisi üzvü Elmin Həmzəyə 25, Nizami Rayon Məhkəməsində Nəriman İsmayılova 30, Yasamal Rayon Məhkəməsində isə Ərəstun Baxışəliyevə də 30 sutka həbs cəzası verilib.
İlqar Məmmədov İsmayıllıda baş verən etirazlardan sonra Tofiq Yaqublu ilə birgə həbs edilib. Onların hər ikisini ixtişaş törətməkdə təqsirləndirilib.
İlqar Məmmədov 7 il, Tofiq Yaqublu 5 il müddətinə azadlıqdan məhrum edilib. Tofiq Yaqublu İlham Əliyevin 2016-cı ildə imzaladığı əfv sərəncamı ilə azadlığa buraxılıb.
