İsmayıllada güclü küləyin evsiz qoyduğu ailəni İcra Hakimiyyəti çadırda yerləşdirib

İsmayıllı rayonunda güclü yağış və dolu nəticəsində 10-dan artıq evə ziyan dəyib.

Bu barədə Trend-ə açıqlamasında İsmayıllı rayon Fövqəladə hallar komissiyasının sədri Rövşən Ağayev məlumat verib.

Komissiya sədri deyib ki, güclü külək Diyallı kənd Mədəniyyət Evinin dam örtüyünü dağıdıb. Orada məskunlaşan bir məcburi köçkün ailəsi müvəqqəti olaraq çadırla təmin edilib.

“Bununla bağlı Qaçqın və Məcburi Köçkünlərlə İş üzrə Dövlət Komitəsinə məlumat verilib. Ailə çadırda yerləşdirilib, ev əşyaları ilə təmin olunmasına da köməklik göstərilir. Bundan başqa, kənd ərazisində evlərin dam örtüyünə də ziyan dəyib. Hazırda həmin evlərin siyahısı hazırlanıb və dəymiş ziyan müəyyənləşib. Sığortası olan evlərin sənədləri sığorta şirkətinə təqdim olunacaq”.

Aramsız yağışlar rayon ərazisində 4 min hektar taxıl sahəsinə ziyan vurub. 50 hektar taxıl, 2 hektar isə tütün sahəsi su altında qalaraq tamamilə məhv olub.

Rövşən Ağayev deyib ki, sel suları digər kəndlərə də ciddi ziyan vurub. Kəndlərə gedən elektrik xətləri qırılıb, Talıstan və Mücü kəndlərində su xətləri dağılıb, kəndlərə aparan yolları sel yuyub. Dağlıq ərazilərdəki kəndlərdə vəziyyət daha da pisdir.