Tbilisidə metropoliten işçiləri maaşlarının artırılması tələbi ilə tətil keçirir

Tbilisidə metropoliten işçiləi tətil keçirir. Bütün stansiyalarının fəaliyyəti səhər saatlarından dayanıb.

APA yazır ki, əmək haqlarının artırılmasını tələb edən metro işçiləri tələbləri yerinə yetirilməyənə qədər tətili davam etdirəcəklərini bildiriblər. Onlar aclıq askiyasına da başlamağı planlaşdırırlar.

Tbilisi meri Kaxa Kaladze keçirdiyi xüsusi brifinqdə tətili qanunsuz adlandıraraq, maşinistləri dərhal işə çıxmağa çağırıb və əmək haqlarının artırılmayacağını bildirib.

Tbilisi Nəqliyyat Şirkətinin məlumatında isə metro işçilərinin tətili başa çatana qədər avtobuslarda gediş ödənişsiz olacağı açıqlanıb.

Tbilisi metropoliteninin işçilərinin orta aylıq əməkhaqqı 1038 lari (421 dollar) təşkil edir. Metro işçiləri saatlıq əmək haqlarının 7 laridən 10 lariyə qədər artırılmasını tələb edirlər. Tbilisidə hər gün təxminən 290 min adam metrodan istifadə edir.