Vətəndaş cəmiyyəti nümayəndələri ötən gün saxlanılan və haqqında hələ də ailəsinə və yaxınlarına məlumat verilməyən hüquqşünas Emin Aslanla bağlı müraciət imzalayıb. Müraciətdə Emin Aslanın ABŞ-ın Sirakuz Universitetində təhsil alıb ölkəyə yenicə qayıtması və Bulvarda gəzərkən mülki geyimli şəxslər tərəfindən naməlum istiqamətə aparılması vurğulanır. O da qeyd olunur ki, E.Aslanın vəkilinin və yaxınlarının hüquq-mühafizə orqanlarına, DİN-in qaynar xəttinə telefon zəngləri cavabsız qalır.
Müraciəti imzalayanlar ictimai fəalların küçədə oğurlanması, saxlanma yerlərinin gizlədilməsi, qapalı məhkəmə iclaslarında uydurma ittihamlarla həbs edilməsi ilə bağlı rüsvayçı praktikadan hiddətləndiklərini bildirirlər. Onlar hüquq-mühafizə orqanlarının rəhbərlərindən E.Aslanovun harada saxlanması barədə dərhal onun yaxınlarına, vəkilinə və ictimaiyyətə məlumat verilməsini, təqsirkar şəxslərin cəzalandırılmasını tələb edirlər.
Müraciəti 130-a yaxın fəal, hüquq müdafiəçisi, jurnalist, bloger, siyasi partiya fəalı imzalayıb.
