Azərbaycanda aprelin 11-də keçirilən növbədənkənar prezident seçkiləri Avropa Şurası Parlament Assambleyasının (AŞPA) iyun sessiyasında müzakirə olunacaq. Bunu Azərbaycanın AŞPA-dakı nümayəndə heyətinin rəhbəri Səməd Seyidov Azadlıq Radiosuna müsahibəsində deyib.
“Gündəlikdə birdən-birə yeni məsələ peyda olub. O məsələ ki, artıq bağlanmışdı, müzakirə olunmuşdu. Söhbət Azərbaycandakı prezident seçkilərindən gedir. Apreldəki prezident seçkiləri iyun sessiyasının gündəliyinə daxil olunub” – deyə o bildirib.
O, müsahibəsində AŞPA-nın büro iclasında Azərbaycanda siyasi məhbus məsələsi üzrə məruzəçi təyin edilməsi haqqında da danışıb. S.Seyidov hesab edir ki, bu, AŞPA ilə Azərbaycan arasında münasibətləri gərginləşdirə bilər:
“Bizim bu məsələdə mövqeyimiz belədir ki, konfrontativ məsələlərin gündəmə gətirilməsi Azərbaycan-Avropa Şurası münasibətlərinə xeyir verməz. Ona görə ki, Türkiyəyə, Belarusa qarşı bu cür addım nəticəsiz qaldı. Hesab edirəm ki, bu cür addımlar münasibətlərin yaxşı istiqamətdə inkişafına xidmət etməyəcək. Əksinə, problemləri daha da qabardacaq, kəskinləşdirəcək”.
AŞPA-ya Ermənistandakı seçkiləri və Paşinyanın bəyanatını müzakirə etməyi məsləhət görən S.Seyidov əlavə edib ki, AŞPA Azərbaycanda olmayan siyasi məhbus problemini müzakirə etmək istəyir.
Siyasi məhbus probleminə niyə birdəfəlik son qoyulmamağı ilə bağlı sualı isə deputat belə cavablandırıb:
“Siyasi məhbus məsələsinə, onun tərifinə, ona yanaşmada dövlətin, millətin mentalitetinə, götürdüyü öhdəliklərə baxışlar fərqlidir. Bu problem dialoq, masa arxasında müzakirə edilməsə, həllini tapa bilməyəcək. Onlar dialoqdan çəkinirlər. Biz təklif edirik ki, gəlin, oturaq, müzakirə edək, Azərbaycan hansı istiqamətdə inkişaf etməlidir. Amma onlar da deyir: “Budur, bunu da etməlisiniz”. Biz də artıq “Budur, bunu etməlisiniz”in nəyə gətirdiyini görmüşük”.
