Bu gün Bakı Apellyasiya Məhkəməsində hüquqşünas Emin Aslanın şikayəti üzrə məhkəmə prosesi keçirilib. Emin Aslanın vəkili Elçin Sadıqovun jurnalistlərə verdiyi məlumata görə, onların şikayəti təmin olunmayıb.
“Qərarda göstərilir ki, gecə saat 23:30 radələrində Emin Aslanı Nərimanov adına istirahət parkında tutublar. O, orada telefonla kiminləsə söhbəti zamanı söyüş söyüb. Polis söyüşlərin qarşısını almağa cəhd edəndə o, söyüş söyməyə davam edib. Amma əslində Emin Aslanı iyunun 4-ü saat 17:30 radələrində “Park Bulvar”ın qarşısında tutulub aparılıb. Biz bunu təsdiq edən şahid ifadələri də təqdim etmişik” – deyə E.Sadıqov bildirib.
Vəkil əlavə edib ki, onların məhkəmədə qaldırdığı 8 vəsatətdən heç biri təmin olunmayıb.
Emin Aslan məhkəmədə çıxışı zamanı bildirib ki, onu Meydan TV ilə bağlı dindiriblər.
ABŞ-ın Sirakuz Universitetində hüquq sahəsi üzrə təhsilini yenicə başa vuran hüquqşünas Emin Aslan iyunun 4-ü Bakıda mülki geyimli şəxslər tərəfindən saxlanılıb. Nişanlısı ilə birlikdə ikən “Park Bulvar” yaxınlığında saxlanılan hüquqşünasın harada olması və vəziyyəti barədə onun yaxınları 1 sutkadan çox məlumat ala bilməyiblər.
İyunun 5-i onun Nərimanov rayon Məhkəməsində vəkilinə məlumat verilmədən məhkəmə prosesi keçirilib. Hakim ona İnzibati Xətalar Məcəlləsininin 535.1-ci (Polisin qanuni tələbinə tabe olmama) maddəsinə əsasən 30 sutka inzibati həbs cəzası verib.
