Azərbaycanın Avropa Şurası Parlament Assambleyasındakı (AŞPA) nümayəndə heyətinin rəhbəri Səməd Seyidov qurumun yay sessiyasında iştirak edəcəyini açıqlayıb. APA xəbər verir ki, S.Seyidov buna heç bir sanksiyanın qoyula bilməyəcəyini deyib:
“Avropa Şurası Parlament Assambleyasının yay sessiyasında Büronun üzvü, o cümlədən Azərbaycanı təmsil edən şəxs kimi mən də iştirak edib öz mövqeyimi bildirəcəm”.
S. Seyidov əlavə edib ki, AŞPA-da fəaliyyət üçün iki əsas funksiya var: “Bunlardan biri öz ölkəni, ya da Avropanı narahat edən problemlərə dair sənədləri təqdim etmək, ikincisi isə öz mövqeyimizi bildirməkdir. Buna heç bir sanksiya qoyula bilməz. AŞPA-da bizə qarşı işləyən qüvvələrin fikri o idi ki, biz bu sanksiyalara kəskin reaksiya verərək AŞPA-dan üz döndərək. Başa düşmürlər ki, biz AŞPA-nı bu cür işləyən insanlardan daha yaxşı tanıyırıq. Bir qrup insanların mövqeyinin hansısa mərhələdə reallaşması o demək deyil ki, Azərbaycan qurumdan imtina edəcək. Əksinə, sessiyada aktiv fəaliyyət göstərəcəyik və əminəm ki, onların arzuları ürəklərində qalacaq”.
AŞPA-nın Qaydalar Komitəsi korrupsiya hesabatında adı çəkilən 4 üzvünə mayın 16-da sanksiya tətbiq edib. Sanksiyaya görə, Pedro Agramunt (İspaniya) 10 il, Cezar Preda (Rumuniya) 2il, Səməd Seyidov (Azərbaycan) 2 il və Jordi Xuclà (İspaniya) 2 il müddətinə AŞPA-nın komitələrində vəzifə tutmaq, prezident və vitse-prezident seçilmək, məruzəçi və seçki müşahidəçisi olmaq hüquqlarından məhrum ediliblər.
