Pambıq tarlasındakı zəhərlənmənin səbəbi məlum olub

Saatlı rayonunda pambıq tarlasında baş verən zəhərlənmənin ilkin səbəbi açıqlanıb. Qida Təhlükəsizliyi Agentliyinin sədri Qoşqar Təhməzli APA-ya açıqlamasında deyib ki, ekspertizaların ilkin rəyinə əsasən zəhərlənmənin mənşəyi qida məhsulu deyil: “Bu, qida zəhərlənməsi deyil. İlkin nəticələrə görə, zəhərlənmə pambıq tarlasında istifadə olunan herbisidlərdən baş verib”.

Herbisid alaq otu kimi tanınan arzuolunmaz bitkilərin inkişafının qarşısını almaq üçün istifadə olunan kimyəvi birləşmədir.

• 10 iyunda Saatlı rayonunda pambıq tarlasında 24 nəfər zəhərlənib, vəziyyəti ağır olan 4 nəfər Bakı şəhərinə köçürülüb. Xəstələrin hamısının vəziyyətinin qənaətbəxş olduğu bildirilir. Onların bir qismi evə buraxılıb.