Vəkillər Kollegiyası vəkil İradə Cavadovanın kollegiya üzvlüyünə xitam verilməsi ilə bağlı məhkəməyə müraciət qərarı qəbul edib. Kollegiyanın yaydığı məlumata görə, bu qərarın qəbul olunmasına səbəb vəkildən kollegiyaya edilən şikayət olub. Şikayətçi K.M. aprelin 21-i göndərdiyi şikayətdə bildirib ki, İradə Cavadova ona etibarnamə verilmədiyi və hüquqi yardımla bağlı müqavilə imzalamadıqları halda onun adından şikayət edib.
İttihama görə İ.Cavadova şikayətçinin Daxili İşlər Nazilirliyinin Baş Mütəşəkkil Cinayətkarlıqla Mübarizə İdarəsində qanunsuz saxlanılması barədə əsassız şikayətlər edib və bu barədə kütləvi informasiya vasitələrində məlumatlar yayıb. K.M. deyib ki, həmin məlumatlar həqiqəti əks etdirmir və onun şərəf və ləyaqətinə toxunulub. K.M. kollegiyadan xahiş edib ki, vəkil haqqında tədbir görülsün.
Vəkillərin İntizam Komissiyasında şikayətə baxılıb və vəkillərin davranış qaydaları haqqında əsasnamənin, o cümlədən “Vəkillər və vəkillik fəaliyyəti haqqında” Qanunun tələblərinin pozulduğu müəyyən edilib. Komissiyanın qərarına əsasən vəkil İradə Cavadovanın kollegiya üzvlüyünə xitam verilməsi ilə bağlı məhkəməyə müraciət edilməsi barədə qərər qəbul olunub.
Məsələ ilə bağlı MeydanTV-yə danışan İradə Cavadova Vəkillər Kollegiyasının məlumatının yanlış olduğunu və İntizam Komissiyasının qərəzli rəy verdiyini deyib:
“Komissiya sübutları əhatəli araşdırmayıb. Mənim müdafiə etdiyim şəxs barəmdə guya şikayət yazıb. Mən müdafiə xarakterli tədbirlər görmüşəm, Rəyasət Heyətində mənə niyə təkzib verməməylə bağlı suallar oldu, halbuki, şikayətçi mənə bu barədə müraciət etməyib”.
Bundan əvvəl vəkillər kollegiyası Xalid Bağırov, Yalçın İmanov, Fəxrəddin Mehdiyev və başqa vəkillər barədə də eyni qərarı çıxarıb. Bu vəkillər hamısı siyasi motivli məhkəmə proseslərində iştirak edib.
