Daxili İşlər Nazirliyi Lerikdə yeniyetmə qızın zorlanması ilə bağlı məlumata münasibət bildirib. APA yazır ki, zorlanma hadisəsi ilə bağlı Lerik rayon Polis Şöbəsinə eləcə də nazirliyin digər aidiyyəti sutrukturlarına hər hansı məlumat və müraciət daxil olmayıb:
“Yeniyetməyə qarşı zorakılıq etməkdə adı hallanan şəxsin evinə hücum olması barədə yayılan məlumatlar da həqiqətdən uzaqdır və bu iddialar təxribat xarakterli dezinformaisyalardır”.
Hadisə ilə bağlı məlumatı iyunun 19-da “Talışi Sədo” qəzetinin redaktoru Rafiq Cəlilov yayıb. Redaktor yazıb ki, rayon sakinlərinin ona verdiyi məlumata görə, 13 yaşlı qız “Azərişıq”-ın Lənkəran regionu üzrə rəis müavini Aydın Məmmədovun qardaşı oğlu və sürücüsü, 25 yaşlı Elnur Elman oğlu Məmmədov tərəfindən zorlanıb. Həmin şəxs 7-ci sinif şagirdinin video görüntülərini çəkib və onu mütəmadi şantaj edib. Azyşalı hamilə qalandan sonra hadisə üzə çıxıb.
Zorlandığı deyilən qızın atası Rasim Təhməzov Meydan TV-yə danışıb. O, yayılan məlumatların əsassız olduğunu deyib:
“O adam ki, bunu yayıb onun qızından, anasından, bacısından xəbəri yoxdur. Mənim ailəmə şər atıblar. Belə bir hadisədən söhbət gedə bilməz. Mənim əmim qızı onların gəlinidir, qohumuq, gediş-gəlişimiz var. Özü də qapı qonşumuzdur. O yazıqlar da pis vəziyyətə düşüblər. Deyirlər, Rasim, bu, nə söhbətdir, yayılıb, biz nə edək? Bununla bağlı prezidentə, Baş Prokurorluğa, Daxili İşlər Nazirliyinə şikayət etmişəm. Şər atanlar barədə bir tədbir görsünlər”.
Ata iddia edir ki, qızı uşaqlıqdan onu zorlamaqda ittiham edilən oğlanla beşikkəsdidir və evlilik yaşı çatanda onların toyunu edəcəklər.
Məsələdə adı hallanan Aydın Məmmədov da hadisə ilə bağlı danışıb. O, “Qafqazinfo”ya açıqlamasında bildirib ki, bu xəbər böhtandır.
“Bu xəbəri yayanları məhkəməyə verirəm. Tamam böhtandır. Sübut olunmadığı təqdirdə cinayət işi açdıracam. Bu üsullarla məni şantaj edirlər. Mən Cəlilabad rayon Elektrik Paylayıcı Şəbəkəsinə rəisi idim. Bu kampaniya o zaman da davam edirdi. Mən həmin jurnalisti məhkəməyə verdim, cinayət işi açıldı və 2 il 6 ay da həbs verildi. İndi də bu məsələylə bağlı o qəzeti məhkəməyə verirəm. Qoy gəlsinlər, sübut etsinlər” – deyə o vurğulayıb.
A.Məmmədov həm də əlavə edib ki, adıçəkilən ailəylə heç bir əlaqələri yoxdur. Eləcə də o, qardaş oğlunun həmin qızla evlənəcəyi xəbərini də təkzib edib.
