Ərdoğan xalqa təşəkkür etdi: Ümid edirəm namizədlər nəticələrə kölgə salmaz

Türkiyədə prezidentliyə namizəd və seçkilərin ilkin rəsmi nəticələrinə görə 52.7% səs toplayan Rəcəb Tayyib Ərdoğan seçkinin nəticələri ilə bağlı çıxış edib. O, çıxışında qeyd edib ki, növbəti prezidentlik dönəmində də xalq ona etimad göstərib. Eləcə də parlamentdə çoxluğu onun sədri olduğu Ədalət və İnkişaf Partiyası (AKP) və onların da içində olduğu “Cumhur İttifaqı”na verib.

“Bu vacib gündə gedib səs verərək vətəndaşlıq borcunu yerinə yetirən hər kəsə minnətdaram. Mənə, partiyamıza və ittifaqımıza səs verənlərə təşəkkür edirəm. Seçki qutularının təhlükəsizliyi və səsvermə Türkiyə demokratiyasının gücüdür. Bu gün millətimiz azad iradəsilə gedib səs verib, özü və ölkəsi üçün seçimini edib”.

Ərdoğan çıxışında seçkidə iştirak edən prezidentliyə və millət vəkilliyinə namizədlərə də təşəkkür edib.

“Ümid edirəm ki, heç kim öz uğursuzluğunu gizləmək üçün ölkəmizin seçki sisteminə və seçkilərinə nəticəsinə kölgə salaraq ölkəmizdəki demokratiyanın bu böyük gücünə zərər verməyəcək. Hesab edirəm ki, seçicilərin seçkidə rekord sayda iştirakı onların bizə və bütün dünyaya çox önəmli bir mesajıdır. Mesaj kifayət qədər açıqdır. Türkiyə seçkidə 90% fəallıqla bütün dünyaya demokratiya dərsi verdi”.

Ərdoğan vurğulayıb ki, hazırda dünyada seçkilərdə 30,40, 50% seçici fəallığı olan ölkələr özlərini demokrat kimi tanıtdıqları halda Türkiyə 90% seçici fəallığı ilə bu demokratiya dərsini həyata keçirib.

“Öz ölkələrindəki seçkilərdə 50%-ə çatmayan seçici fəallığı ilə əldə edilən nəticələri demokratik hesab edib, amma bizə hələ də çəp baxanları dəvət edirəm ki, bu nəticələri yaxşı oxusunlar. Millətimin 24 iyun demokratiya zəfərini bir daha təbrik edirəm” – deyə o əlavə edib.

O eyni zamanda ona zəng edib təbrik edən dövlət başçılarına da minnətdarlıq edib.