Seçki məntəqəsində İYİ Partiyanın rayon təşkilatının sədri qətlə yetirilib

Türkiyənin Ərzurum şəhərinin Karaçoban rayonunda seçki məntəqəsində baş verən silahlı qarşıdurma zamanı 3 nəfər ölüb. Sözcü qəzeti yazır ki, ölənlərdən biri İYİ partiyanın rayon təşkilatının sədri Mehmet Sıddık Durmazdır.

Hadisəni İYİ Partiyanın Ərzurum bölgə sədri İbrahim Dumlu təsdiqləyib. O bildirib ki, M.S.Durmazın nəşi hazırda xəstəxanaya aparılır.

Hadisə ilə bağlı Cümhuriyyət Xalq Partiyasının (CHP) Karaçoban rayon təşkilatının sədri Hüsnü Yılan açıqlama verib.

“Daxili İşlər Nazirliyindən 24 əməkdaş bura gəldi. Biz bununla razılaşmadıq və etiraz etdik. Daha sonra da Ədalət və İnkişaf Partiyasının (AKP) Ərzurumdan millət vəkilliyinə namizədi gəldi, adını bilmirəm. Onun da seçki məntəqəsində dayanmağına etiraz etdik. Dava başladı. Atəş açdılar. Bundan sonra Mehmet Sıddık Durmaz, səs verən bir vətəndaş və Agit Yazan həlak oldu” – deyə H.Yılan bildirib.