Seçkilərin rəsmi nəticələri açıqlanmadan İlham Əliyev Ərdoğanı təbrik edib

Azərbaycan prezidenti İlham Əliyev Türkiyədə prezidentliyə namizəd Rəcəb Tayyib Ərdoğanı seçkidəki qələbəsi münasibətilə təbrik edib. Prezidentin mətbuat xidmətinin yaydığı məlumata görə, İlham Əliyev Ərdoğana zəng edib.

Rəcəb Tayyib Ərdoğan göstərilən diqqətə və təbrikə görə ona təşəkkür edib.

İlham Əliyev Rəcəb Tayyib Ərdoğanı Azərbaycana rəsmi səfərə dəvət edib. Dəvət minnətdarlıqla qəbul edilib.

• İlham Əliyevlə yanaşı Fələstin, Bosniya və Herseqovina, Macarıstan liderləri də Ərdoğanı seçkidə qalib gəlmiş hesab edib və bu münasibətilə təbrik ediblər.

• Bu gün Türkiyədə növbədənkənar prezident və parlament seçkiləri keçirilib.

• Son rəsmi açıqlamalara görə səsvermə qutularının 76%-i hesablanıb.

• Anadolu Agentliyi Ərdoğanın 54% səslə irəlidə olduğunu yaysa da digər mənbələr Ərdoğanın topladığı səsin 43% olduğunu bildirir. Onun əsas rəqibi Cümhuriyyət Xalq Partiyasından (CHP) olan namizəd Muharrem İncədir.