CHP-nin qarşısında seçicilər səslərin sayılmasını gözləyir. Foto: mikroskop media

İstanbulun Sultanqazi bölgəsi Qazi məhəlləsində Xalqların Demokratiya Partiyasının (HDP) parlament üçün yetərsayı toplamasını qeyd edən partiya tərəfdarlarına polis müdaxilə edib. Mesopotamiya xəbər agentliyi yazır ki, polis “HDP xalqdır, xalq buradadır”, “Selo başqan” şüarları səsləndirən adamlara qaz bombası və plastik mərmi atıb. Polisin müdaxiləsindən sonra kütlə yaxınlıqdakı küçələrə dağılışıb.

Bir müddət sonra HDP-nin Sultanqazi qərargahı önündə toplanıb və hazırda orada gözləyirlər.

Eyni zamanda həmin ərazidə yerləşən İstiqlal orta məktəbində 6 ədəd seçki bülleteni torbasının oğurlandığı iddia edilib. Məktəbdə olan vətəndaşların verdiyi məlumata görə bülletenlərin olduğu torbalar polisin müşayiəti ilə avtomobilə qoyulub və məktəbdən uzaqlaşdırılıb. Səslərin oğurlandığını iddia edərək məktəbin qarşısına toplanan insanlara da polis bibər qazı atıb.

Esentepe məhəlləsində isə hakim Ədalət və İnkişaf Partiyası (AKP) HDP-nin seçki bürosuna hücum edib. Hücum zamanı büronun pəncərələri sınıb və bir neçə nəfər yüngül xəsarət alıb. Polis hücum edən dəstəni oradan uzaqlaşdırıb.

Sultanbəyli şəhər meydanında toplaşan çoxlu sayda AKP və Milliyətçi Hərəkat Partiyası (MHP) tərəfdarı HDP Sultanbəyli rayon təşkilatına hücum edib. Binada olan bir qrup HDP-li binanı tərk edə bilmir. Rayon təşkilatının sədri Burhan Taşdemir bildirib ki, dəfələrlə polisə zəng edib xəbər versələr irqçi dəstəni dağıtmırlar.

HDP-nin Ümraniye rayon təşkilatının da önündə bir qrup adam toplaşıb və küçədəki HDP bayraqlarını yandıraraq binaya daşla hücum edib. Vətəndaşların verdiyi məlumata görə polis baş verənləri izləməklə kifayətlənib və binada 11 kişi köməksiz vəziyyətdə qalıb, oranı tərk edə bilmir.

Paytaxt Ankarada da HDP rayon təşkilatlarına hücumlar olub və qarşısı alınıb.

Şərhini yaz

Şərhinizi yazın
Adınızı daxil edin