İyunun 27-də AŞPA-nın yay sessiyasında Lüksemburqdan deputat İv Kruşenin bəzi AŞ ölkələrində vətəndaş cəmiyyəti hüquqlarının pozulması haqda sənədi qəbul edilib.
AŞPA-nın yay sessiyasında Lüksemburqdan deputat İv Kruşen məruzəsini oxuyur. Foto: Ellen Wuibaux / Council of Europe
Turan yazır ki, pozuntulara yol verən ölkələr arasında Azərbaycanın da adı var. Ölkədə qeyri-hökumət təşkilatlarının fəaliyyəti üçün şəraitin ciddi pisləşdiyi bildirilir.
Bundan öncə AŞ hakimiyyəti QHT-lər haqqında qanunvericiliyi ləğv etməyə və Venesiya Komissiyasının rəyini nəzərə almağa çağırıb.
Lakin Azərbaycan hakimiyyəti 2015-2016-cı illərdə QHT-lərlə bağlı hüquqları sərtləşdirib, xarici donorların Azərbaycanda fəaliyyətini və xaricdən qrant almağı qadağan edib.
Məhz buna görə Mədən Sənayesində Şəffaflıq Təşəbbüsü (MSŞT) Azərbaycanın bu qurumdakı üzvlüyünü aşağı salıb və sonra dayandırıb.
Qəbul edilən sənəddə Bakının QHT-lərə qarşı bu siyasətinə son qoyması ilə bağlı Avropa Şurasının çoxsaylı çağırışları və qətmanəsinə baxmayaraq, Azərbaycan hakimiyyətinin buna məhəl qoymamağa davam etdiyi qeyd olunur.
İlham Əliyev və Mehriban Əliyeva 11 aprel növbədənkənar prezident seçkilərində səsvermə məntəqəsində. Foto: Eqor Aliyev / TASS
26 iyunda isə AŞPA-da Azərbaycanda keçirilən seçkilərlə bağlı rumıniyalı deputat Viorel Badya hazırladığı rəy dinlənilib. Rəydə qeyd edilib ki, Aprelin 11-də Azərbaycanda keçirilən növbədənkənar prezident seçkiləri azadlıqların məhdudlaşdırılması şəraitində keçirilib. Demokratik prinsiplərin gözdən salındığı, qanunun aliliyinə əməl olunmadığı repressiv siyasi şəraitdə ədalətli və azad seçkilərin keçirilməsinin mümkün olmadığı qeyd edilib.
Bundan öncə Avropa Şurası Venesiya Komissiyası Azərbaycan Konstitusiyasına dəyişikliklərini də tənqid edib.
