Gəncənin keçmiş icra başçısı Elmar Vəliyev. Foto: ganja-ih.gov.az

Baş Prokurorluq, Daxili İşlər Nazirliyi və Dövlət Təhlükəsizliyi Xidmətinin mətbuat xidmətləri Gəncənin icra başçısı Elmar Vəliyevə qarşı sui-qəsdlə bağlı birgə məlumat yayıb. APA yazır ki, məlumatda icra başçısı və onun cangüdəni Qasım Aşbazovun xəsarət aldığı və hazırda xəstəxanada olduqları qeyd olunub.

Hadisəni kim törədib: 1983-cü il təvəllüdlü Yunis Səfərov. O, artıq həbs edilib.

Cinayət işi hansı maddələrlə açılıb: Fakt üzrə Baş Prokurorluqda Cinayət Məcəlləsinin 29, 120.2.3-cü, 120.2.7-ci (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar qəsdən adam öldürməyə cəhd) və 228-ci (qanunsuz olaraq odlu silah əldə etmə) maddələri ilə cinayət işi başlanıb. Baş prokurorluğun, Daxili İşlər Nazirliyinin və Dövlət Təhlükəsizliyi Xidmətinin əməkdaşlarından ibarət istintaq-əməliyyat qrupu yaradılıb.