Gəncənin icra başçısı Elmar Vəliyevi güllələyən Yunis Səfərovun işgəncəyə məruz qalması ilə bağlı sosial şəbəkədə yayılan fotosu təsdiqlənib. Bunu Daxili İşlər Nazirliyinin mətbuat xidmətinin rəisi Ehsan Zahidov APA-ya açıqlamasında bildirib.
“Yunis Səfərov cinayəti törətdikdən sonra həmin ərazidə xidmətdə olan polis əməkdaşları onun tutulması üçün dərhal hərəkətə keçib. Bu zaman silahlı cinayətkar polisə müqavimət göstərib. Belə olan halda polis güc tətbiq edib, onu vuraraq yerə yıxıb. Fotoda əks olunan xəsarətlər də həmin zaman onun aldığı xəsarətlərdir. Bir daha qeyd edirəm ki, Yunis Səfərov zərərsizləşdirilərək saxlanıldıqdan sonra ona heç bir işgəncə verilməyib”.
Ötən günkü açıqlama: DİN-in mətbuat xidmətinin rəisi Ehsan Zahidov “Bizimyol”a deyib ki, fotoşəkil uydurma, yayılan məlumatlar isə tamamilə yalandır. “Cinayəti törədən şəxs istintaq altındadır. Ona hərhansısa bir işgəncədən, təzyiqdən söhbət belə gedə bilməz”. – deyə DİN sözcüsü bildirib.
