“Criminal.az” saytının baş redaktoru Anar Məmmədovun evində axtarış aparılıb. Meydan TV yazır ki, axtarışı dünən axşam Baş Prokurorluğun iki müstəntiqi edib və ona məxsus noutbuku, telefonu və sənədləri götürüblər. Ötən gün artıq bir dəfə dindirilən Anar Məmmədov bu gün yenidən Bakı Şəhər Prokurorluğuna çağırılıb.
Bastainfo saytının iyulun 9-da ifadə verən rəhbəri Mustafa Hacıbəyli də bu gün yenidən Bakı Şəhər Prokurorluğuna çağrılıb.
Nə baş verib: İyulun 9-u Baş Prokurorluq məlumat yayıb və bildirib ki, Gəncə Şəhər İcra Hakimiyyətinin başçısı Elmar Vəliyevə qarşı edilən sui-qəsdlə əlaqədar bir neçə sayta qarşı da cinayət işi başlanıb. Həmin media qurumları çağırış xarakterli, ictimaiyyəti çaşdıran məlumatlar paylaşmaqda günahlandırılırlar.
