Dövlətə xəyanətdə ittiham edilərək öldürülən hərbçilərin günahsız olduğu məlum olub

2017-ci ilin mayında 200 nəfərə yaxın hərbi və mülki şəxslər Ermənistan kəşfiyyatına xidmət göstərərərək məxfi məlumatlar ötürməkdə ittiham olunaraq həbs edilir.

Daha sonra həbs edilənlərin bəziləri müəmmalı şəkildə ölür.

Ifact.ge ölən hərbçilərdən biri Süleyman Kazımovun yaxınları ilə danışıb.

Süleyman Kazımov 10 uşaqlı ailədə doğulub və uşaqlıqdan hərbçi olmaq istəyib. O, 9-cu sinfi başa vurduqdan sonra Bakıdakı Cəmşid Naxçıvanski adına hərbi məktəbə daxil olub. Əvvəlcə Ağdamdakı hərbi hissədə 6 il batalyon komandiri kimi çalışıb, daha sonra Tərtərə təyin edilib.

Həbslər və nəticəsi barədə

Adını açıqlamayan mənbələr deyir ki, istintaq zamanı hərbçilər işgəncəyə məruz qalıb və ölüm halları baş verib. Ölənlərin sayını isə dəqiqləşdirmək mümkün olmayıb. Ölən hərbçilər arasında olan kapitan Süleyman Kazımov ötən il mayın 7-də Mingəçevirdəki hərbi hissədə ölənədək döyülüb. Ailəsinə isə deyilib ki, S.Kazımov avtomobil qəzasında ölüb. Cəsədi doğulduğu Amankəndə gətirilib və uzun sürən mübahisədən sonra onun yalnız üzü ailə üzvlərinə göstərilib.

Hərbçinin ailəsinə 11 min manat birdəfəlik sığorta pulu ödənib və kapitanın aylıq 1050 manat əmək haqqı da onlara verilməkdə davam edir.

Öldürülən hərbçilərin ailələrinin tələbi

Kazımovun ailəsi və digər əsgərlərin də ailələri zabitlərin ölümündə günahkar olanların tapılması məqsədilə hərbi prokurorluğa müraciət ediblər. Müstəntiq Hümmət Məmmədov deyib ki, onun ölümündə təqsirləndirilən üç zabit var. Bu iş artıq məhkəməyə də göndərilib. Kazımovun adının çəkilməsini istəməyən qohumu deyir ki, H.Məmmədov onlara Süleymanın ölümünün anlaşılmazlıqdan olduğunu deyib.

Amma 1 ay yarım sonra Kazımovun həyat yoldaşına hərbi prokurorluqdan onun ittiham edildiyi cinayət əməlinin sübuta yetirilməməsi və bu səbəbdən cinayət işinə xitam verilməsi haqda rəsmi sənəd də verilib.

Ailə üzvləri hesab edir ki, Süleyman Kazımova da şəhid adı verilməlidir.