Türkiyədə 2016-cı il iyulun 15-də dövlət çevrilişi cəhd zamanı Ərdoğanın xalqa “meydanlara çıxın” çağırışına cavab olaraq insanlar meydnlara çıxır. Foto: AA
Türkiyədə 2016-cı il iyulun 15-də baş verən dövlət çevrilişi cəhdindən sonra elan edilən fövqəladə vəziyyət bu gün ləğv edilib. Bu müddət ərzində fövqəladə vəziyyət müddəti 7 dəfə uzadılıb. Fətullahçı Terror Təşkilatı (FETÖ) adı verilən təşkilatla mübarizə çərçivəsində iki il ərzində minlərlə adam həbs olunub.
Rəsmi məlumat:
160 min nəfər saxlanılıb
70 mindən çox adam həbs edilib
155 min adam barəsində silahlı təşkilata üzv olmaq ittihamı ilə cinayət işi açılıb
Daxili İşlər Nazirliyi terror təşkilatının təbliğatının aparılması, dövlət rəhbərlərinin təhqir edilməsi ittihamı ilə sosial şəbəkələrdəki 45 min 415 hesabı araşdırıb. Bu araşdırmadan sonra 17 min 89 nəfər barədə qanuni tədbir görülüb.
Ümumilikdə 128 min 391 nəfər işdən çıxarılıb ki, onlardan 7 min 80 nəfəri universitetlərdən çıxarılıb.
Dövlət işindən çıxarılan 121 mindən çox adamın məhkəmə hökmü ilə bir də dövlət işində, eləcə də özəl sektorda işləməyi qadağan olunub.
Fövqəladə vəziyyət mediadan da yan keçməyib; 70 qəzet, 20 jurnal, 34 radio bağlanıb. Həmçinin 30 nəşriyyat və paylama şirkəti, 33 televiziya kanalının fəaliyyəti dayandırılıb. Çoxlu sayda jurnalist barəsində terrorun təbliğatı və prezidenti təhqir etmək ittihamları ilə cinayət işi açılıb.
Türkiyə Jurnalistlər Birliyinin yaydığı məlumata görə hazırda Türkiyədə 143 jurnalist həbsdədir.
