Dövlət büdcəsindən 3 milyon manatdan artıq əsassız ödəniş edildiyi aşkarlanıb

Maliyyə Nazirliyinin Dövlət Maliyyə Nəzarəti Xidməti bu ilin I yarısında apardığı nəzarət tədbirlərinin nəticələrini açıqlayıb. Report yazır ki, nəzarət tədbirləri nəticəsində dövlət büdcəsindən ayrılan vəsaitin 3 milyon 77 min manat məbləğində artıq və əsassız ödənişlər aşkarlanıb. Bu məbləğin 1 milyon 540 min manatı bərpa edilib və digər əsassız ödənişlərin davam etdirilməsi dayandırılıb.

Maliyyə qaydalarını pozan vəzifəli şəxslər barəsində İnzibati Xətalar Məcəlləsinə uyğun olaraq müvafiq inzibati protokollar tərtib edilib, 456 vəzifəli şəxsə ümumilikdə 384,1 min manat məbləğində inzibati cərimələr tətbiq edilib və həmin cərimələrin dövlət büdcəsinə ödənilməsi təmin olunub.

1 milyon 443 manatın mənimsəmə əlamətləri aşkar olunduğundan haqqında Baş prokurorluğa sənəd göndərilən 5 təşkilat:

• Səhiyyə Nazirliyinin B.Ə.Eyvazov adına Elmi-Tədqiqat Hematologiya və Transfiziologiya İnstitutu

• Ağstafa Mərkəzi Rayon Xəstəxanası

• Mədəniyyət Nazirliyinin Salyan Rayon Mədəniyyət və Turizm Şöbəsi

• Kənd Təsərrüfatı Nazirliyinin Yevlax Baytarlıq İdarəsi

• Ekologiya və Təbii Sərvətlər Nazirliyinin D.Yusifov adına Qəbələ Qızıl Balıqartırma Zavodu

Aşkar edilən əsassız ödənişlərin 12 təşkilat üzrə 276,9 min manata nəzarət tədbirləri üzrə sənədlər isə İnzibati Xətalar Məcəlləsinin 54.2-ci maddəsinə uyğun olaraq inzibati xətalar haqqında işlər üzrə icraatın başlanması üçün qərar qəbul edilməsi məqsədi ilə aidiyyatı üzrə prokurorluq orqanlarına göndərilib.