Milli Məclisin hüquq məsələləri və dövlət quruculuğu üzrə komitəsinin sədri Əli Hüseynli virtualaz.org-a müsahibəsində yeni geosiyasi şərtlər daxilində Azərbaycanın hətta Kollektiv Təhlükəsizlik Müqaviləsi Təşkilatında (KTMT) iştirakını da nəzərdən keçirməyin mümkünlüyünu bildirib. Meydan TV “Xəzər” Hərbi Tədqiqatlar İnstitutunun rəhbəri Cəsur Sümərinlidən bu təkliflər bağlı fikirlərini öyrənib. Sizə həm Əli Hüseynlinin, həm də Cəsur Sümərinlinin fikirlərini maksimum qısaldaraq təqdim edirik.
Əli Hüseynli və Cəsur Sümərinli. Foto: report, screenshot. Kollaj: mikroskop media
Əli Hüseynlinin fikirləri
İndiki Rusiyanı müstəqil ölkələrin suverenliyi üçün təhlükə kimi qiymətləndirmək həddən artıq populist və yanlış yanaşmadır.
Azərbaycan hazırda Cənubi Qafqazda Rusiyanın yeganə müttəfiqidir.
Təşkilatı sırf hərbi blok kimi nəzərdən keçirməyə dəyməz. Bu daha çox hərbi təhlükələrdən savayı, təhlükəsizlik problemləri, beynəlxalq terrorçuluğa, qeyri-leqal miqrasiyaya, kibercinayətkarlığa qarşı fəaliyyətlə məşğul olan regional beynəlxalq təşkilatdır.
Azərbaycanın KTMT-yə qoşulacağı halda Dağlıq Qarabağ münaqişəsinin həlli istiqamətində özünün vasitəçilik səylərini fəallaşdıracaq.
Cəsur Sümərinlinin fikirləri
KTMT-yə qoşulmaqla Azərbaycan hakimiyyətinin 2010-cu ildən sonra daha sürətlə yürütdüyü Rusiyayönümlü siyasəti öz kulminasiya nöqtəsinə çatacaq.
Azərbaycanda ordu quruculuğunda Rusiyanin təsiri xeyli artacaq, orduda indiyədək tətbiq olunmuş bir sıra NATO standartları dəyişdiriləcək və ya ləğv ediləcək. Ordunun Avro-Atlantik standartlara uyğun qurulmasına yönəlik addımlar, ümumiyyətlə, dayandırılacaq.
Azərbaycan hərbçilərinin Rusiyanın hərbi məktəblərinə göndərilməsi siyasəti gücləndiriləcək, beləliklə ordunun kadr baxımından Rusiyadan asılılığı artacaq.
Azərbaycanda gələcəkdə Rusiyanın hərbi bazalarının yerləşdirilməsi üçün zəmin yaradılacaq. Azərbaycan “Qoşulmamaq hərəkatı”ndan çıxacaq”.
Dağlıq Qarabağ münaqişənin nizamlanması dondurulacaq, Moskva KTMT üzvü olan iki ölkə arasında aktiv hərbi əməliyyatların aparılmasına razı olmayacaq.
Azərbaycan NATO ilə bir sıra əməkdaşlıq proqramlarının icrasını dayandıracaq.
Azərbaycanın bir saylı milli təhlükəsizlik problemi – ərazi bütövlüyünün təmin olunması mümkün olmayacaq.
Dövlət vəsaitləri, hərbi büdcə tamamilə Rusiyadan alınacaq silah, hərbi texnika və avadanlığa xərclənəcək. Bütün bunlar Azərbaycan ordusunun güclənməsinə gətirməyəcək, müdafiə və təhlükəsizlik sahəsində korrupsiya daha da güclənəcək, Rusiyanın hərbi müəssisələrindən silah alınmasında qeyri-şəffaflıq, qeyri-hesabatlıq davam edəcək. Qərblə indiyədək mövcud olmuş hərbi-siyasi əməkdaşlıq formatları dəyişdiriləcək və ləğv ediləcək.
Əli Hüseynlinin müsahibəsini bütöv olaraq buradan oxuya bilərsiniz.
