Şamaxı Safari Parkındakı ceyranlar. Foto: president.az

Ekologiya və Təbii Sərvətlər Nazirliyi Qax Dövlət Təbiət Yasaqlığının yaxınlığında yerləşən Acınohur düzənliyində ceyranların həyatına təhlükə olacaq əkin sahələri ilə bağlı açıqlama yayıb. Nazirlikdən Trend-ə verilən məlumata görə, ölkə əhalisinin kənd təsərrüfatı məhsullarına olan tələbatının ödənilməsi məqsədilə ərazinin 7500 hektarı “Aqroinkişaf-2017” MMC-yə ayrılıb.

“Aqrar fəaliyyət zamanı Acınohur düzünün qonşu ərazilərində məskunlaşan ceyran populyasiyasının mühafizəsi, yaşama aspektlərinin nəzərə alınması və təsərrüfat işləri aparılarkən ceyranların yaşam şəraitinə təsir göstərən amillərə ciddi riayət olunması şirkət rəsmilərinin diqqətinə çatdırılıb”.

Nazirlik Acınohur gölünün cənub hissəsində ceyranların yem bazası üçün zəruri olan 2000 hektaradək ərazidə tədqiqatların aparıldığı dövrdə bütün fəaliyyətlərin dayandırılacağını bildirib.

Nazirlik Qax və Samux rayon rəsmilərinə Acınohur gölünün cənubunun və Mingəçevir su anbarının şimal hissəsi ilə həmsərhəd olan ərazilərdə ceyranların yem bazasınıın azalması, sürüləri qoruyan itlərin ceyranlara birbaşa təhlükə yaratması barədə də tövsiyələr verib. Gələcəkdə bu torpaq sahələrinin heyvandarlıq məqsədilə fermerlərə verilməsinin məhdudlaşdırılması, istifadəyə nəzarətin gücləndirilməsi təklif edilib.

Nə baş verib: Qax Dövlət Təbiət Yasaqlığının bəzi hissələrinin əkin sahəsi üçün ayrılması bu ərazidəki canlıların həyatına təhlükə yaradıb. Ekoaktivist Cavid Qara Meydan TV-yə açıqlamasında deyib ki, tək ceyranların yox, müxtəlif növ quşlar, sürünənlər, ayı, vaşaq, çöl pişiyi, qara kərkəs, sar, imperator qartalı, bəzgəkin də yaşadığı ərazinin əkin sahəsinə çevrilməsi onların nəslinin kəsilməsinə səbəb olacaq.

Şərhini yaz

Şərhinizi yazın
Adınızı daxil edin