Bu gün Nəsimi Rayon Məhkəməsi Gədəbəy rayonunun keçmiş icra başçısı Saleh Rüstəmov barəsində həbs qətimkan tədbirini 3 ay uzadıb. Avqustun 31-də isə onun qardaşı oğlu Vidadi Rüstəmli barədə eyni qərarı çıxarıb. Bu barədə Turan-a danışan Saleh Rüstəmovun qardaşı Taleh Rüstəmov onu da deyib ki, Saleh Rüstəmova və onun qardaşı oğluna qohumları ilə görüşə və telefonla danışmağa hələ də imkan verilmir.
Nə baş verib: Mayın 26-da Azərbaycan Baş Prokurorluğu S.Rüstəmovun və V.Rüstəmlinin AXCP fəalı Aqil Məhərrəmov, Ruslan Nəsirli və Babək Həsənovla birlikdə AXCP-nin “qanunsuz maliyyələşdirilməsi” işi üzrə həbs olunduğunu bildirib. Həbs olunanlara qanunsuz sahibkarlıq, cinayətkar yolla əldə edilmiş pulların yuyulması və s. ittihamlar irəli sürülüb.
AXCP-nin reaksiyası: Partiya qanunsuz maliyyə əldə etmə barədə ittihamları rədd edib.
Hüquq müdafiəçiləri nə düşünür: Onlar həbs edilən 5 nəfəri siyasi məhbus hesab edərək dərhal azadlığa buraxılmalarını tələb edirlər.
