AŞPA Gültəkin Hacıbəyliyə tətbiq etdiyi sanksiyanı ləğv edib

Avropa Şurası Parlament Assambleyası (AŞPA) keçmiş millət vəkili, Milli Şuranın Koordinasiya Mərkəzinin üzvü Gültəkin Hacıbəyliyə tətbiq etdiyi sanksiyanı ləğv edib. Bu barədə G.Hacıbəyli facebook-da yazıb.

Qurumdan ona göndərilən electron məktubu paylaşan sabiq millət vəkili yazıb ki, sentyabrın 3-ü Parisdə keçirilən iclasda AŞPA-nın İmmunitetlər və Prosedur Qaydaları Komitəsi onunla bağlı 28 iyun tarixindəki son iclasında qəbul etdiyi qərarı yekdilliklə ləğv edib.

“Komitə AŞPA-da korrupsiya olaylarının 2012-2015-ci illəri əhatə etdiyini, mənim isə 2010-cu ildən sonra bu qurumla hər hansı bağlantımın olmadığını nəzərə alıb məni “Kürü diplomatiyası” ilə bağlı, ümumiyyətlə, sorğulamadı. Yəni, adım istintaqa dəvət olunanların siyahısına yanlışlıqla daxil edilibmiş”.

Nə baş verib: Avropa Şurası Parlament Assambleyası 2018-ci aprelin 26-da qurumun bir neçə üzvünün Azərbaycanla münasibətdə korrupsiya hallarına yol verməsi ilə bağlı iddiaların olduğu hesabatı qəbul edib. 123 səslə qəbul olunan hesabat Avropa Şurasının 10 ay davam edən istintaqının nəticəsi kimi hazırlanıb. Hesabatda deyilir ki, AŞPA-nın bəzi deputatları Azərbaycandan xalça, bahalı zinət əşyaları, suvenirlər alıb. Onların arasında hətta seks xidməti təklif olunanlar da var.