Murad Ədilov. Foto: şəxsi arxiv / facebook

Sentyabrın 5-də 10 saylı cəzaçəkmə müəssisəsində AXCP üzvü Murad Ədilovun vaxtından əvvəl azadlığa buraxılması üçün verdiyi ərizəsi üzrə məhkəmə prosesində hakim Vüsal Qurbanov 10 saylı cəzaçəkmə müəssisəsinin rəhbərliyinin verdiyi mənfi rəyi əsas gətirərək Ədilovu azadlığa buraxmayıb.

Bu barədə M.Ədilovun qardaşı jurnalist Natiq Ədilov məlumat yayıb.

Natiq Ədilov deyir ki, qardaşının və digər siyasi məhbusların azad edilməsi üçün beynəlxalq ictimaiyyətin yetərincə təpkisi yoxdur.

“Düzdür, “Amnesty İnternational” Muradı “vicdan məhbusu” elan edib. Amma bu, sadəcə, bəyanatdır. Bir dəfə eşitmədim, görmədim ki, bu adama görə çağırış eləsinlər. Çağırış bir yana, adi məktub da göndərməyiblər ki, “darıxma, yaxşı olacaq”. Belə münasibət olan yerdə hakimiyyət Muradı və başqa siyasi məhbusları niyə azad etməlidir ki? Üstəlik, onun həbsinin əsl səbəbi mənim siyasi baxışlarım və tənqidçi jurnalist kimi fəaliyyətim olub, mən də mövqeyimdən geri çəkilməmişəm”.

Nə baş verib: Murad Ədilov 2014-cü il avqustun 11-də narkotik ittihamı ilə həbs edilib. Lənkəran Ağır Cinayətlər Məhkəməsinin hökmü ilə 6 il azadlıqdan məhrum olunub.