Meriya yağışın fəsadlarını Bakının mərkəzindəki yeni tikililərlə əsaslandırıb
Yağışdan sonra Sabunçu ərazisi. Foto: screenshot / MeydanTV
Bakı Şəhər İcra Hakimiyyəti dünən paytaxtda yağan güclü yağışdan sonra yollarda yaranan vəziyyətlə bağlı açıqlama yayıb. Qurumdan “Qafqazinfo”ya verilən məlumatda bunun səbəbləri belə izah edilib:
40 dəqiqə ərzində yağan yağıntının miqdarı Bakıda 21 mm olub, bu da aylıq 17.2 mm normasından çoxdur. Bunu təbii fəlakət saymaq olar.
Fəsadların texniki səbəbi kimi son dövrlərdə paytaxtın mərkəzi ərazilərində yeni tikililərin daha da çoxalmasını göstərmək olar. Həmçinin müstəqil qurum olan “Azərsu” ASC-nin mövcud kollektorlarının fövqəladə hallarda böyük su kütləsinin axıdılmasının öhdəsindən tam şəkildə gələ bilməməsi də səbəblərdən biridir.
Güclü yağışın yağması təbiət hadisəsidir, dünyanın bütün ölkələrində baş verir və heç bir ölkə bu kimi hallardan sığortalanmayıb. Ötən illərdə Avropanın aparıcı ölkələrində güclü sel və subasmalar olub. Ona görə də buna adi təbiət hadisəsi kimi baxılmalıdır.
Nə baş verib: Sentyabrın 23-də Bakıda yağan güclü yağış yollarda, küçələrdə fəsadlar törədib. İri su gölməçələri hərəkəti məhdudlaşdırıb və hətta bəzi yerlərdə avtobusların içi də yağış suyu ilə dolub.
