Narkoloji Mərkəzdəki yanğınla bağlı həbs edilən həkim ölüb

Respublika Narkoloji Mərkəzdə baş verən yanğınla bağlı həbs edilən həkim Azad Ələkbərov ölüb.

Bunu Azad Ələkbərovun vəkili Fuad Ələkbərov Oxu.Az-a məlumat verib.

A.Ələkbərov Müdafiə Nazirliyinin Hospitalında sentyabrın 28-dən 29-na keçən gecə vəfat edib. A.Ələkbərov bir müddət əvvəl infarkt keçirib.

Nə baş verib: Bu ilin 2 martında Respublika Narkoloji Mərkəzində yanğın baş verib. Nəticədə 25 nəfər həlak olub.

Kimlər həbs edilib: Mərkəzin direktoru Telman Məmmədhəsənov, şöbə müdiri Azad Ələkbərov və mühəndis Mahir Abdullayev barəsində Nəsimi Rayon Məhkəməsi 3 ay müddətinə həbs qətimkan tədbiri seçib.

Yanğını törətməkdə şübhəli bilinir: Narkoloji Mərkəzdə “alkoqol qəbulu nəticəsində psixi və davranış pozuntuları” diaqnozu ilə müalicə alan Bakı şəhər sakini Məhəmməd Məmmədov 2018-ci il mart ayının 3-də həmin cinayətdə şübhəli şəxs qismində tutulub.