Fuad Əhmədli: Ərizəni verməkdə məqsədim məhkəmə prosesində dostlarımı görmək idi

Oktyabrın 4-də Bakı Apelyasiya Məhkəməsində AXCP Gənclər Komitəsi Xətai rayon şöbəsinin sədri Fuad Əhmədlinin şikayətinə baxılıb. Cəbhəçi fəal onun cəzaçəkmə müəssisəsinə köçürülməsinə dair ərizəsini təmin etməyən Suraxanı Rayon Məhkəməsinin qərarından apelyasiya şikayəti verib.

Hakim Sahibxan Mirzəyevin sədrliyilə keçirilən məhkəmə prosesində F. Əhmədlinin özündən başqa, saxlandığı 16 saylı cəzaçəkmə müəssisəsinin əməkdaşı da iştirak edib. Cəzaçəkmə müəssisəsinin əməkdaşının onun haqqında dediklərini qəbul etməyib:

“Tədbirlərdə iştirak etmədiyim barədə söylənilənlər də doğru deyil. Emin müəllim mənim dəstə rəhbərimdir, onunla da heç bir problemimiz yoxdur. Mənim mübarizəm cəzaçəkmə müəssisəsilə deyil, daha yüksək səviyyədədir. Haqqımda çıxarılan sifarişli qərarlar da mübarizənin ölkə rəhbərliyi səviyyəsində olduğunu sübut edir. Mən bu ərizəmin də təmin olunmayacağını bilirdim. Ərizəni verməkdə məqsədim məhkəmə prosesində dostlarımı görmək idi. Dostlarımı görməkdən ötrü haqqımda deyilən böhtanlara da razıyam. Dostları görməyə dəyər”.

Dövlət ittihamçısı Anar Məmmədov şikayətin təmin olunmamasını istəyib. Bildirib ki, cəzaçəkmə müəssisəsinin rəyi əsas götürülməlidir.

Məhkəmə də apelyasiya şikayətini təmin etməyib.

Nə baş verib: F.Əhmədli 2016-cı il avqustun 17-də həbs olunub. O, Cinayət Məcəlləsinin 302 (əməliyyat-axtarış fəaliyyəti haqqında qanunvericiliyi pozma) və 308-ci (vəzifə səlahiyyətlərindən sui-istifadə) maddələri ilə təqsirli bilinərək 4 il azadlıqdan məhrum edilib. O, operator işlədiyi “Azerfon” şirkətində (NarMobile) bir neçə müştəri haqda məlumatları kənar şəxslərə ötürməkdə ittiham olunur. Fuadın həbsindən sonra onun yaşadığı evdən Fətullah Gülən haqda disklər, kitablar tapılıb. Ancaq məhkəməsində və ittiham aktında bu haqda heç bir fikir bildirilməyib.

  • F.Əhmədli həm evindən Gülənə aid materialların tapılması, həm müştəri məlumatlarını yayması haqda ittihamları rədd edib. Bildirib ki, o, AXCP üzvü olduğuna, hakimiyyəti tənqid etdiyinə görə sifarişlə həbs olunub.

Şərhini yaz

Şərhinizi yazın
Adınızı daxil edin