Həbsdəki AXCP fəalları “kars”a salanıb

AXCP funksionerləri Babək Həsənov, Aqil Məhərrəmov və Ruslan Nəsirli saxlandıqları Kürdəxanı təcridxanasında 3 sutkalıq cərimə kamerasına (“kars”) salınıblar.

Bu barədə məlumatı Meydan TV-yə Babək Həsənovun qardaşı Qüdsi Həsənov verib.

O, fəalların hansı səbəbdən cəzalandırıldıqlarını bilmədiyini, amma araşdırdığını bildirib.

Meydan TV Penitensiar Xidmətdən məsələyə münasibətini öyrənmək cəhdi baş tutmayıb.

Nə baş verib: AXCP Rəyasət Heyətinin üzvü Aqil Məhərrəmli, Gənclər Komitəsi Məclisinin sədri Ruslan Nəsirli və Nərimanov şöbəsinin sədri, keçmiş Qarabağ döyüşçüsü, bundan əvvəl də məhbus həyatı yaşamış Babək Həsənov mayın 25-də axşam saatlarında saxlanıblar.

• Fəalların saxlanılması ilə bağlı Baş Prokurorluq və Daxili İşlər Nazirliyi (DİN) birgə məlumat da yayıb.

• Həmin açıqlamaya görə, AXCP funksionerləri və mayın əvvəlində həbs edilən Gədəbəy rayonunun keçmiş icra başçısı Saleh Rüstəmli çirkli pul vəsaitlərini leqallaşdırmaqda ittiham olunurlar. Açıqlamada S.Rüstəmlinin Rusiyadan AXCP-yə pul göndərdiyi, həbs edilmiş cəbhəçilərin həmin vəsaitləri alıb partiya rəhbərinə çatdırdıqları bildirilir. İddialarda söhbət ümumilikdə 412 min dollardan gedir.

AXCP sədri nə deyir: Əli Kərimli bu ittihamın qondarma olduğunu bildirib və həbsləri partiyaya qarşı illərdir davam edən repressiyaların davamı kimi qiymətləndirib. O, Saleh Rüstəmli ilə uzun illərdir dost olduqlarını və S.Rüstəmovun ona dostu olaraq, bir neçə dəfə 500-1000 dollar (ümumilikdə 4-5 min) pul yardımı edib.

İttiham təsdiqini taparsa: Adları çəkilən şəxslərə CM-nin 192 (qanunsuz sahibkarlıq) və 193-cü (cinayət yolu ilə əldə edilmiş pul vəsaitlərini və ya digər əmlakı leqallaşdırma) maddələrinin müxtəlif bəndləri ilə ittiham irəli sürülüb. Bu maddələrdə 7 ildən 12 ilə qədər həbs cəzası nəzərdə tutulub.