Bibiheybət məscidinin yaxınlığında yerləşən qəbiristanlığın istinad divarı uçub.
“Qafqazinfo” yazır ki, torpaq sahəsinin də bir hissəsi sürüşüb. Hazırda ərazidə bərpa işləri aparılır.
Nə baş verib: 12 oktyabrdan Bakının Badamdar qəsəbəsindən 20-ci sahəyə gedən yolun kənarındakı yamacda sürüşmə aktivləşib. Nəticədə həmin yolda hərəkət məhdudlaşdırılıb və yamacda yerləşən 8 fərdi yaşayış evinin sahibinə evləri müvəqqəti boşaltmaq tapşırığı verilib.
Rəsmilər nə deyir: Rəsmilər hadisədə bir-birini ittiham edir.
Baş nazirin müavini Hacıbala Abutalıbov sürüşməyə səbəbin kanalizasiya sularının olmasını göstərib. “Su olmayan yerdə sürüşmə olmur. Torpağın altındakı gil su daxil olanda sabun halını alır və üzərindəki torpağı sürüşdürüb aparır”.
Bakı şəhər İcra Hakimiyyəti başçısının müavini Eldar Əzizov isə bu hadisənin kanalizasiya sistemi ilə bağlı olmadığını və vaxtilə bu ərazidə tikinti tikməyə qərar verən adamların da məsuliyyət daşımalı olduğunu deyir. “Onlar landşaftı görəndə tikintinin məqsədəuyğun olmadığını bilməli idilər”.
