Səudiyyə Ərəbistanın İstanbuldakı konsulluğunda öldürüldüyü bildirilən jurnalist Camal Qaşıqçının qətli ilə bağlı dəlillər aşkarlanıb. Euronews yazır ki, bu barədə məlumatı türkiyəli rəsmiyə istinadən Associated Press yayıb. Oktyabrın 2-dən etibarən yoxa çıxan jurnalistin ölümünü araşdırmaq üçün türk polisi ötən gün konsulluqda araşdırma aparıb.
Konsulluqda qətlə yetirilərək doğranan və doğranmış cəsədi konsulluqdan çıxarılan jurnalistin ölümü ilə bağlı əldə edilən sübutların nə olduğu açıqlanmayıb.
Səudiyyə Ərəbistanın İstanbul, Türkiyədəki konsulluğu qarşısında Türk-Ərəb Media Birliyi üzvlərinin təşkil etdiyi etiraz aksiyası zamanı səudiyyəli jurnalist Camal Xoşaqqinin posterini tutan kişi. Foto: Chris McGrath / Getty Images
ABŞ-ın dövlət katibi Maykl Pompeo jurnalistin qətlini araşdırmaq üçün Türkiyəyə gəlib. Ankara hava limanında Türkiyə prezidenti Rəcəb Tayyib Ərdoğanla görüşən Pompeo Türkiyənin xarici işlər naziri Mövlud Çavuşoğlu ilə də görüşəcək.
Bundan əvvəl isə dövlət katibi oktyabrın 16-da Səudiyyə Ərəbistanında olub və Səudiyyə Ərəbistanının kralı Salman bin Əbdüləziz Al Səudla və vəliəhd şahzadə Məhəmməd bin Salman bin Əbdüləziz Al Səudla görüşüb.
Nə baş verib: Səudiyyə Ərəbistanı vətəndaşı, “Vaşinqton post” qəzetinin əməkdaşı Camal Qaşıqçı oktyabrın 2-də Krallığın İstanbuldakı Baş Konsulluğunun binasına daxil olduqdan sonra itkin düşüb.
Konsul haradadır: Səudiyyə Ərəbistanın Türkiyədəki baş konsulu Məhəmməd əl Uteybi isə diplomatik toxunulmazlığından istifadə edərək Türkiyəni tərk edib. Rəsmilər deyir ki, konsul ötən gün yerli vaxtla 17:00 radələrində təyyarə ilə ölkəsinə yola düşüb.
ABŞ-ın reaksiyası: ABŞ-ın respublikaçı senatı Lindsey Qraham jurnalistin qətli ilə əlaqədar Səudiyyə şahzadəsi Məhəmməd ibn Salmanı günahlandırıb. O düşünür ki, C.Qaşıqçını şahzadə öldürtdürüb və bu addımı ilə ölkəsini ləkələyib. Senatın sözlərinə görə jurnalisti öldürən adam şahzadənin dostudur və Səudiyyə xüsusi xidmət orqanlarında çalışır.
ABŞ prezidenti Donald Tramp Səudiyyə kralı Salman bin Əbdüləzizlə telefonla danışıb və kral jurnalistin başına gələnlərlə bağlı heç nə bilmədiklərini deyib.
