Elgiz Qəhrəmanın “kars”dan sonra böyrəkləri və ürəyi ağrıyır

Həbsdə olan NİDA vətəndaş hərəkatının üzvü Elgiz Qəhrəmanın səhhətində problemlər yaranıb.

Bu barədə MeydanTV-yə hərəkatın koordinatoru Samir Əsədli məlumat verib. O, deyib ki, Elgiz Qəhrəman 3 gün “kars”da qalandan sonra səhhətində ciddi problemlər yaranıb.

“Onun böyrəkləri ağrıyır və dünəndən ürəyində ciddi ağrılar başlayıb”.

Samir Əsədli onu da deyib ki, Elgiz Qəhrəman cərimə kamerasında (“kars”) döyülüb.

Penitensiar Xidmət nə deyir: Xidmətin ictimaiyyətlə əlaqələr üzrə rəsmisi Mehman Sadıxov deyib ki, məhbusun döyülməsindən söhbət gedə bilməz, çünki buna tam ciddi nəzarət olunur.

“Axı məhbusa əl qalıdırmağa nə ehtiyac var?! Müvafiq aktlar var ki, məhkum özünə, məhbəsdəkilərə və nəzarətdəkilərə fiziki zor tətbiq etmək istəyirsə, onun qanunsuz əməllərinin qarşısını almaq üçün bu və ya digər xüsusi vasitələr tətbiq edilə bilər. Amma bu halda məsələ aktlaşdırılır və məhkumun şəxsi işinə əlavə olunur”.

Nə baş verib: Elgiz Qəhrəman 2016-cı il avqustun 12-də saxlanılıb və həmin gün onun barəsində Cinayət Məcəlləsinin 234.4.3-cü (külli miqdarda narkotik maddənin qanunsuz dövriyyəsi) maddəsi ilə həbs qətimkan tədbiri seçilib. O, 2017-ci ilin yanvarın 16-da 5,5 il müddətinə azadlıqdan məhrum edilib. Fəal 14 saylı cəzaçəkmə müəssisəsində saxlanılır.

Şərhini yaz

Şərhinizi yazın
Adınızı daxil edin