Azərbaycanda zorakılığa məruz qalan qadınlara dəstək qrupu yaradılıb

Qadın haqları ilə bağlı illustrasiya. Müəllif: Mitch Blunt / Getty Images

Bir qrup qadın hüquqları aktivisti Azərbaycanda şiddətə məruz qalıb köməksiz vəziyyətə düşən həmcinslərinə yardım üçün təşəbbüs qrupu yaradıb. Yazar Günel Mövlud, Günay Mustafayeva və jurnalist Səmra Sədrəddinlinin birgə yaratdığı qrupun məqsədi qadınlara hüquqi, psixoloji və s. yardımlar etməkdir.

Avropada yaşayanlar kampaniyaya dəstək üçün hər ay ortaq hesaba göndərilən pulun köməyi ilə ailədaxili şiddətlə üzləşən qadınlara dəstək olacaq. Bununla yanaşı təşəbbüs qrupuna pulsuz hüquqi yardım, mühasibatlıq, həmçinin evsiz qalanlara könüllü olaraq öz evini təklif etməklə dəstək olanlar da var.

Jurnalist Səmra Sədrəddinli deyir ki, bu il sosial mediada bir neçə dəfə qadına şiddət mövzusu gündəmə gəlib və sevindirici haldır ki, qadınlar artıq bunu ictimailəşdirməkdən çəkinmirlər:

“Ancaq bu müddət ərzində görürdük ki, mövzu bir neçə gün müzakirə ediləndən sonra unudulub gedir, o qadınlara heç bir hüquqi və psixoloji yardım olmur. Biz də qadınları bir neçə gün yox, daimi olaraq dəstəkləməyə qərar verdik. Bu qərarımızı ictimaiyyətə açıqlayandan sonra yüzlərlə insan dəstək oldu. Təəssüf edirəm ki, kampaniyaya qoşulanlar arasında kişilər çox azdır”.

Jurnalist həm də ona görə təəssüflənir ki, Azərbaycanda hakimiyyətə iddialı heç bir siyasətçi bu haqda yazmır, danışmır.

“Çünki bilirlər ki, patriarxal cəmiyyətdə bu mövzu onlara xal qazandırmayacaq. İnanıram ki, gec-tez vəziyyət dəyişəcək. Ona görə ki, bu mövzuda sivil dünyadan ən az 200 il geridəyik və özümüz etməsək bunları bizim üçün heç kim etməyəcək”.

Şərhini yaz

Şərhinizi yazın
Adınızı daxil edin