Türkiyənin “Daily Sabah” qəzetinin əməkdaşı Nazif Karaman “Əl-cəzirə”yə İstanbulda Səudiyyə Ərəbistanı konsulluğunda öldürülən jurnalist Camal Qaşıqçının son sözlərinin nə olduğunu açıqlayıb. Onun sözlərinə görə Qaşıqçı son dəfə boğulduğunu deyib.
“Boğuluram. Bu torbanı başımdan çıxarın. Mən klostrofobikəm”.
Nazif Karaman bu məlumatı jurnalistin konsulluqda olduğu vaxt ərzində qeydə alınan və hələ ki, yayımlanmayan səs yazısına əsasən verib.
Onun sözlərinə görə, Qaşıqçı başına plastik torba keçirilərək boğulub və qətl 7 dəqiqə davam edib. N.Karaman onu da əlavə edib ki, konsulluqda Qaşıqçının cəsədi hissələrə bölünmədən əvvəl döşəmə plastik torbalarla örtülüb.
Türkiyə prezidenti Rəcəb Tayyib Ərdoğan isə şənbə günü deyib ki, Qaşıqçının ölümü ilə bağlı olan səs yazısı Səudiyyə Ərəbistanı, ABŞ, Almaniya, Fransa və Böyük Britaniyaya təqdim edilib.
Prezident bildirib ki, Səudiyyə Ərəbistanı jurnalistin qatillərinin təxminən 15 nəfərlik qrup olduğunu bilir və və onlar Türkiyəyə oktyabrın 2-də baş verən insidentdən bir neçə saat əvvəl gəliblər.
