İsrailin müdafiə naziri atəşkəsə etiraz olaraq istefa verib

Aviqdor Liberman. Foto: Ammar Awad / Reuters

İsrailin müdafiə naziri Aviqdor Liberman ölkəsinin Həmasla atəşkəs razılığına etiraz olaraq istefa verib. “Əlcəzirə” yazır ki, nazir Misirin vasitəçiliyi ilə ötən gün əldə olunan atəşkəsi terrora məhkum olmaq kimi qiymətləndirib.

Baş nazir Benyamin Netanyahunun qərarına etiraz edən nazirin istefası 48 saat sonra qüvvəyə minəcək.

“Fikir ayrılıqlarına baxmayaraq mən çalışdım ki, bacardıqca uzun müddət hökumətin sadiq üzvü kimi qalım, amma alınmadı” – Liberman deyib.

Nazir onun üçün qəbuledilməz olan əsas iki səbəbdən danışıb:

“İsrail Qatara imkan verir ki, o, Qəzzaya 15 milyon dollar göndərsin. Bu pullardan sərhəddə İsrail əsgərləri ilə döyüşən terrorçuların ailələrinə də çatır. İkinci məsələ isə atəşkəslə bağlıdır. Mən bütün səbəbləri başa düşürəm, amma həm də Həmasın həbs etdiyi insanların üzünə baxa bilmirəm. Həmas başa düşməlidir ki, heç kim cəbhə xəttinə yaxınlaşmamalıdır”.

Nə baş verib: İsraillə Fələstin arasında iki gün davam edən atışma nəticəsində 7 fələstinli həlak olub, 25 nəfər yaralanıb. İsrail tərəfi isə 1 əsgərini itirib və 50 nəfər xəsarət alıb. Ötən gün tərəflər atəşkəs barədə razılığa gəlib.

Şərhini yaz

Şərhinizi yazın
Adınızı daxil edin