Ələkbər Məmməd
Yaponiyada bu yaxınlarda təhlükəsizlik üzrə ekspertlərin və ya hamının tanıdığı adı ilə desək xakerlərin yarışdığı “Pwn2Own” adlı tədbir təşkil olunub. Pul mükafatının da olduğu tədbirdə xakerlər həmin il gündəmdə olan məşhur telefonları və proqramları sındırmağa çalışır. Xakerlərin bu ilki “oyuncaqları” iPhone X (Apple), Galaxy S9 (Samsung) və Mi 6 (Xiaomi) olub.
Tokioda baş tutan tədbirdə ilk uğur qazanan komanda olan Fluoroacetate, Xiaomi şirkətinin Mi 6 modelində yer alan “touch-to-connect” funksiyası (az., “bağlanmaq üçün toxundur” , cihazların bir-biri ilə bağlantısını yaratmaq üçün bir-birinə toxundurmaq) və NFC bağlantısı ilə cihazın təhlükəsizlik “üzlüyünü” sındırmağı bacarıb və bu uğurlarına görə 30 min dollar mükafat əldə ediblər. Həmçinin bu komanda buna bənzər, lakin fərqli bir formada Samsung şirkətinin Galaxy S9 cihazını da sındıraraq 50 min dollar, WiFi bağlantısı vasitəsilə Apple şirkətinin iPhone X cihazını sındıraraq isə 60 min dollarlıq mükafat qazanıblar.
Tədbirin digər iştirakçılarından olan MWR Labs komandası isə tamamilə fərqli bir üsul sınayıblar. Komanda WiFi bağlantısı yolu ilə xüsusi kod snippetlərini (kod parçaları) cihaza köçürə bilən bir xətadan faydalanaraq bir neçə foto çəkməyi bacarıblar. Onlar bu üsulla Mi 6 və Galaxy S9 modelini sındırıb və ümumilikdə 60 min dollarlıq mükafat qazanıblar.
Keçən il təşkil olunan eyni tədbirdə isə komandalar Galaxy S8 (Samsung), Mate 9 Pro (Huawei) və iPhone 7 (Apple) cihazlarını sındıra bilmişdilər.
