Azərbaycan Xalq Cəbhəsi Partiyası partiyanın sədri və fəallarının həbsi ilə bağlı bəyanat yayıb.
Bəyanatda qeyd edilib ki, Xalq Cəbhəsi Partiyası baş vermiş hadisəni Azərbaycanda sərbəst toplaşmaq kimi fundamental haqqa təcavüzün növbəti və daha eybəcər təzahürü kimi qiymətləndirir.
Partiya siyasi azadlıqların bərqərar olması üçün bundan sonra da ardıcıl fəaliyyət göstərəcək. Repressiyaların və təqiblərin AXCP-ni mübarizədən yayındırmayacağını qeyd edilib.
Partiya Əli Kərimlinin və digər üzvlərinin həbsdə saxlanılması, onlara müxtəlif inzibati cəzaların verilməsi tamamilə qanunsuz hesab edir.
Bəyanatda Əli Kərimlinin və onunla birgə saxlanılanların dərhal azad olunması tələb edilir.
Nə baş verib: Bu gün Milli Dirçəliş gününü qeyd etmək məqsədi ilə AXCP və Milli Şura üzvləri Şəhidlər Xiyabanına yürüş etmək istəyib. Polis mane olub və Cəmil Həsənli, Əli Kərimli başda olmaqla 53 fəalı Səbail rayon Polis İdarəsinə aparıb.
11 nəfərin ittihamı nələrdir: Saxlanılan 11 nəfər İnzibati Xətalar Məcəlləsinin 513.2-ci (“Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydada təşkil edilməyən yığıncaq, mitinq, nümayiş, küçə yürüşü və ya piketdə iştirak etməyə görə) maddəsi ilə ittiham olunub.
Əli Kərimli hansı maddələrlə ittiham edilir: AXCP sədri Əli Kərimli iki maddə ilə; 513.2-ci və 513.1-ci ( Yığıncaqların, mitinqlərin, nümayişlərin, küçə yürüşlərinin və piketlərin təşkilinin və keçirilməsinin “Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydasının toplantının təşkilatçısı tərəfindən pozulmasına görə) ittiham edilir.
Bu maddələr üzrə ittiham olunan şəxslərin təqsiri məhkəmədə sübuta yetirilərsə, onları pul cəzası, ictimai işlərə cəlb etmə və ya 2 ay müddətinə inzibati həbs cəzası gözləyir.
Dünən gecə saatlarında Cəmil Həsənli və saxlanılan fəalların bir qismi azadlığa buraxılıb.
AXCP fəallarından Ruslan Qurbanlı 1000 AZN məbləğində cərimə olunub. O, saxlanılan zaman böyrəyindən zədə alıb və polislər onu səkiyə yıxaraq təpikləyib.