Amnesty International AXCP fəallarının həbsi və cərimələnməsini pisləyib

Polis AXCP sədri və fəalların məhkəməsi önündə dayananları uzaqlaşdırır. Foto: Turan

Amnesty International beynəlxalq hüquq müdafiə təşkilatı AXCP fəallarının həbsi və cərimələnməsinə görə Azərbaycan hakimiyyətini tənqid edib.

Təşkilat yaydığı bəyanatda, noyabrın 17-də Bakıda dinc yürüş həyata keçirən müxalifət liderlərinin və fəallarının saxlanılmasını dinc toplaşmaq hüququnun pozulması kimi qiymətləndirib.

Təşkilat tələb edir:

  • Azərbaycan hakimiyyəti Azərbaycan Konstitusiyasında və Azərbaycanın ratifikasiya etdiyi insan hüquqları üzrə beynəlxalq müqavilələrdə tanınmış dinc toplaşmaq azadlığı hüququna zəmanət verməlidir.

  • Hakimiyyət dinc toplaşmaq azadlığı hüququnu həyata keçirmək cəhdinə görə həbs edilmiş fəalları dərhal azad etməlidir.

Nə baş verib: Noyabrın 17-i Milli Dirçəliş günü münasibətilə Şəhidlər Xiyabanına yürüş edən 52 AXCP və Milli Şura fəalı saxlanılıb. Milli Şura sədri Cəmli Həsənli və AXCP sədri Əli Kərimli Səbail rayon Polis İdarəsinə aparılıb. Cəmil Həsənli və fəalların bir qismi həmin gün sərbəst buraxılıb. Əli Kərimli və 7 fəal müxtəlif məbləğlərlə cərimə edilib. 3 nəfər isə Səbail rayon məhkəməsinin qərarı ilə 20 sutka həbs cəzası alıb. Onlar polisə müqavimət göstərməkdə təqsirli bilinib.