Müsavat partiyasının Gənclər Təşkilatının sədri Əblüfəz Sadıqbəyli ötən gün axşam saatlarında həbs olunub. Səbail rayon Məhkəməsi onun barəsində 3 aylıq həbs qətimkan tədbiri çıxarıb. Partiya fəalı CM-in 178.2.1 (qabaqcadan əlbir olan qrup tərəfindən dələduzluq) və 320-ci (saxta sənəd hazırlama və ya istifadə) maddələri ilə ittiham olunur.
Bu gün Müsavat partiyasında həbslə bağlı təcili görüş keçirilib. Hansı addımların atılacağı müəyyənləşib və həbs edilən fəalın vəkili kimi Osman Kazımovun olması qərarlaşdırılıb.
Partiyanın başqan müavini Səxavət Soltanlı Mikroskopa deyib ki, bütün hüquqi yollardan istifadə edilərək Əbülfəz Sadıqbəylinin azadlığa çıxmasına çalışacaqlar. Soltanlı onu da əlavə edib ki, ortada heç bir dələduzluq halı yoxdur. Ekspert tərəfindən saxtakarlıq halı müəyyən edilməyib.
Müsavat başqanı Arif Hacılı Əbülfəz Sadıqbəylinin həbsi barədə danışıb və bunu siyasi motivli həbs kimi qiymətləndirib və Müsavat Gənclər Təşkilatının sədrinin dərhal azad edilməli olduğunu deyib.
