Noyabrın 23-də Binəqədi rayon Məhkəməsində “VİZA” hüquq şirkətinin rəhbəri, hüquqşünas Aslan İsmayılova hökm oxunub. Hakim Mirheydər Zeynalovun sədrliyilə baş tutan məhkəmədə vəkil CM-nin 221.1 maddəsilə xuliqanlıqda təqsirli bilinib. O, illik qazancının 20 faizi tutulmaqla, 1 il islah işləri və 1500 manat da cərimə cəzasına məhkum edilib.
Vəkil deyir ki, onun haqqında olan hökm qanunsuzdur və sifarişlə qəbul olunub:
“Bu cinayət işi haqqımda qaldırılan birinci iş deyil. Sonuncu təqib kampaniyası iki il əvvəl başlayıb. Bunun da bir neçə səbəbi olub. Əsas səbəb isə Milli Onkologiya Mərkəzində baş verən milli faciəmizi sənəd və sübutlarla ictimaiyyətə çatdırmağım oldu. Az-çox Azərbaycanda baş verənlərə bələd olan hər kəsə aydındır ki, yumurta mafiyası və Milli Onkologiya Mərkəzi birbaşa Ədliyyə naziri Fikrət Məmmədovla bağlıdır. Fikrət Məmmədov isə Azərbaycanda sıradan bir nazir deyil. Baş prokuror Zakir Qaralov bir rayon prokurorunu belə, Fikrət Məmmədovun göstərişi olmadan vəzifəyə təyin edə bilməz. Guya müstəqil olan məhkəmələr və Vəkillər Kollegiyası da birbaşa Fikrət Məmmədovun obyektləri kimi fəaliyyət göstərirlər”.
