DİN və Baş Prokurorluq jurnalistə cavab göndərib

Jurnalist Aytac Əhmədovanın polis bölməsində zorakılığa məruz qalması iddiasına Daxili İşlər Nazirliyindən və Baş Prokurorluqdan cavab gəlib.

• Daxili İşlər Nazirliyinin daxili təhqiqatlar şöbəsindən gələn cavabda polis əməkdaşları tərəfindən qanunsuz hərəkətlərə yol verilməsi müəyyən edilməyib.

• Baş Prokurorluqdan isə şikayətin Sabunçu Rayon Prokurorluğunda araşdırıldığı və noyabrın 26-dək nəticəsi haqda məlumat veriləcəyi bildirilib.

Aytac Əhmədova DİN və prokurorluq zorakılığa məruz qalması iddiası ilə bağlı onu qane edən araşdırma aparmazsa, məhkəməyə müraciət edəcəyini deyib.

Nə baş verib: 3 oktyabrda müstəqil jurnalist Aytac Əhmədova Zabrat qəsəbəsində çəkiliş apardığı zaman saxlanılaraq 15-ci polis bölməsinə aparılıb. Jurnalist facebook səhifəsində yazıb ki, orada Qabil adlı polis əməkdaşı onunla aşağılayıcı tonda danışaraq, üzünə şillə vurub. Daha sonra isə çəkdiyi kadrlar polislər tərəfindən silinib.