Rusiya xarici işlər naziri Sergey Lavrov Ukraynanın hərbi vəziyyət müzakirələrinə cavab verib. Sputnik Türkiyə yazır ki, Lavrovun fikrincə, bu qərar qəbul olunarsa, ölkədəki radikalların və millətçilərin “əli-qolu açılacaq”.
Lavrov bu barədə Dominikan Respublikası xarici işlər naziri Migel Varqasla birgə mətbuat konfransında Ukraynaya məxsus 3 hərbi gəminin Rusiya sərhədini pozması haqda danışarkən deyib. Lavrov hesab edir ki, hərbi vəziyyət elan olunsa, öz müstəqilliklərini elan edən qondarma Donetsk və Luqansk Milli Respublikalarının da yerləşdiyi Donbas bölgəsi üçün təhlükəli ola bilər:
“Hərbi vəziyyət elan etsə, Ukrayna həmin bölgədə nələrin baş verəcəyini diqqətlə izlənməlidir. Adi vaxtda belə həmin bölgədə müxtəlif obyektlərə atəş açılır, mülki vətəndaşlar öldürülür və digər bu kimi beynəlxalq hüquqa zidd hallar yaşanır. Hərbi vəziyyət olsa, onda radikallar və millətçilər çox güman ki, özlərini “əli-qolu açılmış” kimi hiss edəcək”.
