Tunis prezidenti İtaliyadakı rəsmi səfərində. Foto: Tullio Puglia / Getty Images

Tunis hökuməti qadın və kişilərə bərabər vərəsəlik hüququ verən qanun layihəsi hazırlayıb və müzakirə edilib ratifikasiya edilməsi üçün layihə parlamentə göndərilib. Middle East Monitor yazır ki, qaun layihəsini Tunis prezidenti Beji Kaid əs-Sebsi hazırlayıb. Keçən il Beynəlxalq Qadınlar Günündə hazırlanan layihə parlamentdə çoxluqda olan Ennahda hərəkatı tərəfindən rədd edilib.

Ennahda qadın və kişiyə bərabər vərəsəlik hüququ verən qanunun şəriət qaydalarına zidd olduğunu düşünür.

Tunis prezidenti isə təklif edir ki, tunislilərin dini qaydalara riayət edib-etməməklə bağlı seçim azadlığı ola bilər. O deyir ki, qanun layihəsi Tunis Konstitusiyası əsasında hazırlanıb.

“Tunis 3 element üzərində olan sivil ölkədir: vətəndaşlıq, xalqın istəyi və qanunun aliliyi” – Sebsi deyib.

Tunislilərin arasında isə qanunun layihəsinin əleyhinə olanlar üstünlük təşkil edir. Beynəlxalq Respublika İnstutunun 2017-ci ildə keçirdiyi sorğunun nəticələrinə görə, tunislilərin 63 faizi bu qanunu dəstəkləmir. Onlardan 52 faizi qadındır.

Əgər parlament qanun layihəsini qəbul etsə, Tunis ərəb ölkələri arasında bərabər vərəsəlik hüququ barədə qanun qəbul edən ilk ölkə olacaq.

Qanun layihəsi ilə bağlı əks fikirlər ölkə xaricində də var. Misirin “Əl-Əzhar” İslam Universitetinin alimi Mahmud Mehanna bununla bağlı Tunis prezidentinə xəbərdarlıq edib. Sebsinin əsas hədəf olduğu çıxışında deyib ki, şəriətdə qadınların kişidən daha çox miras aldığı, kişiyə heç miras qalmadığı halda qadının aldığı 33 fakt var.

Şərhini yaz

Şərhinizi yazın
Adınızı daxil edin