G20 əleyhinə banner. Foto: Juan Mabromata / AFP / Getty Images

“Böyük İyirmilik” (G20) ölkələrinin növbəti sammitinin baş tutacağı Argentinada prezident əhalini paytaxtı tərk etməyə çağırıb. The Guardian yazır ki, cümə günü paytaxt Buenos Airesdə başa tutacaq sammitdə təhlükəsizliyi təmin etmək üçün tədbirlər gücləndirilib.
Cümə günü qeyri-iş günü elan edilib və həmin gün paytaxt üzərində olacaq uçuşlar təxirə salınıb, ictimai nəqliyyatın hərəkəti məhdudlaşdırılıb.

Argentina prezidenti Maurisio Makri əhaliyə uzun həftəsonundan səmərəli istifadə etməyi məsləhət görüb. O təklif edib ki, sakinlər cümə axşamından başlayaraq şəhəri tərk etsinlər, çünki təhlükəsizlik tədbirlərinə görə şəhərdə hərəkət çətinləşəcək.

İctimai nəqliyyatın məhdudlaşdırılması ümumilikdə 12 milyon sakinin işini çətinləşdirəcək. Genişmiqyaslı təhlükəsizlik tədbirləri çərçivəsində 22 min polis və xüsusi xidmət orqanları agenti fəaliyyət göstərəcək. Şəhərin bir çox yerində gediş-gəlişin qadağan olduğu ərazilər olacaq.

Nə baş verir: G20 dünyada ən böyük iqtisadiyyata sahib olan ilk 20 ölkənin toplantısıdır. Həmin ölkələrin dövlət və hökumət başçıları hər il bir ölkədə toplanır. Ötən il sammitə ev sahibliyini Almaniya edib.

Şərhini yaz

Şərhinizi yazın
Adınızı daxil edin