Rəsmi Moskva Trampın Putinlə görüşünü ləğv etməyinə təəssüflənir

Rəsmi Moskva ABŞ administrasiyasının Rusiya və Amerika prezidentlərinin planlaşdırılan görüşünü ləğv etməsi barədə qərar qəbul etməsindən təəssüflənir.

“Report” RİA “Novosti”yə istinadən yazır ki, bunu Putinin mətbuat katibi Dmitri Peskov deyib.

O, görüşün alınmaması ilə beynəlxalq və ikitərəfli gündəlikdə olan ciddi məsələlərin müzakirəsinin qeyri-müəyyən müddətə təxirə salınacağını bildirib.

“ABŞ administrasiyasının iki ölkə prezidentinin Buenos-Ayresdə planlaşdırılan görüşünü ləğv etmək barədə qərarına təəssüflənirik. Rusiya prezidenti Vladimir Putinə gəldikdə isə, o, amerikalı həmkarı ilə əlaqə qurmağa hazırdır”.

Nə baş verib: Dünən Tramp G20 sammitində rusiyalı həmkarı Vladimir Putinlə görüşməyəcəyini açıqlayıb. Tramp Kerç boğazında baş verənlərlə bağlı ona edilən məruzə ilə tanış olandan sonra bu nəticəyə gəlib.

Kerç boğazında nə baş verib: Noyabrın 25-i Rusiya Azov dənizində, Kerç boğazında Ukraynaya məxsus 3 hərbi gəmini şəxsi heyətlə birlikdə ələ keçirib. Bundan sonra iki ölkə arasında böhran yaranıb. Rəsmi Moskva Ukraynaya məxsus hərbi gəmilərin onun sərhədini pozduğunu açıqlayıb.