Xidmət sahəsində çalışanlar nə qədər vergi ödəyəcək?
Milli Məclisin bu gün baş tutan plenar iclasında “Vergi Məcəlləsində dəyişiklik edilməsi haqqında” qanun layihəsi dəyişikliklər müzakirə ediilib və qəbul olunub. Meydan TV yazır ki, yeni qanuna əsasən bəzi peşə sahələrində çalışanların əmək haqlarına, tütün məmumatlarının aksiz markasına və s. görə ödənilən vergilərdə dəyişiklik edilib.
Milli Məclis. Foto: Murad Orujov / Sputnik
Yeni qanunla nələr dəyişib?
Neft-qaz sahəsində fəaliyyəti olmayan və qeyri-dövlət sektoruna aid edilən vergi ödəyicilərində işləyən fiziki şəxslərin muzdlu işdən aylıq gəlirlərindən vergi aylıq əməkhaqqı 8 000 manatadək olduqda 0 səviyyəsində, əməkhaqqı 8 000 manatdan çox olduqda isə 8 000 manatdan çox olan məbləğin 14% həcmində müəyyənləşdirilir. Yeni yanaşmanın 2019-cu il yanvarın 1-dən 7 il müddətində tətbiqi nəzərdə tutulur.
Spirtli içkilər: Azərbaycanda istehsal olunan alkoqollu, alkoqolsuz energetik içkilər, siqarlar, elektron siqaretlər aksiz vergisinə cəlb edilir. Məcəlləyə edilən əlavəyə əsasən;
alkoqollu energetik içkilərin hər litrinə 2 manat
alkoqolsuz energetik içkilərin hər litrinə 3 manat
siqarların, həmçinin ucları kəsilən siqarların bir ədədinə 1 manat
elektron siqaretlər üçün mayenin hər litrinə 20 manat aksiz vergisi tutulacaq.
ƏDV ödəniş qaydaları da dəyişir
Digər dəyişikliklə, fiziki şəxs olan istehlakçılar tərəfindən Azərbaycanda pərakəndə ticarət və ya ictimai iaşə fəaliyyəti göstərən şəxslərdən alınmış mallara (neft və qaz məhsulları istisna olmaqla) görə ödənilmiş ƏDV-nin nağdsız ödəmələr üzrə 15%, nağd ödənişlər üzrə isə 10 faizi geri qaytarıla bilər.
Xidmət sahəsi: Həmçinin, dəyişikliyə əsasən, iaşə obyektlərində müştərilərə xidmət göstərən fiziki şəxslər (ofisiant), fərdi qaydada bərbər və dərzi fəaliyyəti ilə məşğul olan şəxslər də sadələşdirilmiş vergi ödəyicisi olacaqlar. Ofisiantlar sadələşdirilmiş vergi üzrə aylıq sabit məbləğ – 30 manat, bərbərlər 20 manat, dərzilər 10 manat ödəyəcəklər.
Bundan başqa, sadələşdirilmiş vergi (məcəllənin 218.4-cü maddəsində nəzərdə tutulmuş fəaliyyətlə məşğul olan və 218.1.2-ci maddəsində göstərilən vergiödəyiciləri istisna olmaqla) təqdim edilmiş mallara bu verginin ödəyicilərinin malların təqdim edilməsindən, işlərin görülməsindən, xidmətlərin göstərilməsindən əldə etdiyi vəsaitin məbləğindən (ümumi hasilatının həcmindən) və satışdankənar gəlirlərdən 2% dərəcə ilə hesablanacaq.
