Yol polisi haqqında səs yazısı yayan şəxs 15 sutka həbs cəzası alıb

“Whatsapp”da Xətai DYP-nin rəisi Cavanşir Ələkbərovun sürücüləri saxlayaraq onlardan 500 manat tələb etməsi ilə bağlı səs yazısını yayan Fariz Qasımov 15 sutka həbs edilib.

Fariz Qasımovun həbsini Bakı Şəhər Dövlət Yol Polisi İdarəsinin bölmə rəisi Vaqif Əsədov da təsdiqləyib, deyib ki, səs yazısında deyilən məsələlər araşdırılıb və məlum olub ki, F. Qasımov yol polisinə böhtan atıb. Vaqif Əsədov onu da deyib ki, sürücü iki il müddətinə sürücülük hüququndan da məhrum edilib.

Nə baş verib: Sosial şəbəkələrdə yayılan səs yazısında Xətai Rayon Dövlət Yol Polisi İdarəsinin rəisi Cavanşir Ələkbərovdan bəhs olunur. Səs yazısını yayan şəxs bildirir ki, özü də daxil olmaqla, bir neçə sürücü Babək prospektində hərəkətdə olan zaman qara rəngli, 005 nömrəli “Toyota Camry” markalı avtomobil aşağı sürətlə hərəkət edir, nəticədə arxadan gələn sürücülər əsəbiləşərək onu sağdan ötür. Guya 005 nömrəli maşını C.Ələkbərov özü idarə edir və qarşıda onu ötən sürücüləri yol polisi saxlayaraq maşını cərimə meydançasına aparır.